استانادا فاريزا و ڭعارسىنوۆا تۇرعان ءۇيدىڭ قابىرعاسىنا مەموريالدىق تاقتا قويىلدى

استانا. قازاقپارات - اپتا سوڭىنداعى ايتۋلى جاڭالىقتاردىڭ ءبىرى قازاقتىڭ اياۋلى اقىن قىزى فاريزا وڭعارسىن قىزى ءومىرىنىڭ سوڭعى جىلدارى تۇرعان ءۇيىنىڭ قابىرعاسىنا مەموريالدىق تاقتانىڭ قويىلۋى بولدى.  

استانانىڭ باس كوشەلەرىنىڭ بىرىنە دىنمۇحامەد قونايەۆتىڭ ەسىمى بەرىلگەنى بەلگىلى. سول كوشە بويىنداعى ەڭسەلى عيماراتتا اقىن 2009-2014 - جىلدارى تۇرعان ەكەن. شاراپاتتى شارانىڭ تىزگىنىن ۇستاعان پارلامەنت ءماجىلىسىنىڭ دەپۋتاتى قۋانىش سۇلتانوۆ كەلگەن قوناقتاردىڭ كەلەلى پىكىرلەرىن تىڭداۋ ءۇشىن كەزەگىمەن ءسوز بەرىپ تۇردى.

«جاڭا ايتىلعانداي وتكەن عاسىردىڭ 70- جىلدارىنىڭ اياعىندا، 80-جىلدارىنىڭ سوڭىندا قازاق ادەبيەتىنە كەرەمەت ءبىر تولقىن كەلدى. ولار شەتىنەن تالانتتى ەدى. سولاردىڭ ىشىندە ەرەكشە كوزگە تۇسكەن، كەلە سالىپ ءبىر- ەكى جىلدىڭ ىشىندە ءوزىن مويىنداتقان فاريزانىڭ بولمىسى بولەك ەدى. فاريزاعا ءبىز ەش ۋاقىتتا قىز بالا دەپ قاراعان جوقپىز. بىرگە جۇرگەن دوسىمىز، زامانداسىمىز دەپ قارادىق. اسىرەسە، استاناعا كەلگەننەن كەيىن باۋىرمال رۋحاني سانانىڭ وكىلدەرى ءبىر اۋىل بولىپ كەتتىك. قازىر فاريزاسىز سول اۋىلدىڭ ءبىر كىرپىشى كەم سەكىلدى. مۇقاعالي قالاي جاساسا، تۇمانباي قالاي جاساسا، ساعي جيەنبايەۆ قالاي جاساسا فاريزا دا سولاي قازاق تاريحىندا جاساي بەرەدى. ءبىز وعان سەنىمدىمىز»، - دەدى العاش بولىپ ءسوز العان جازۋشى، فاريزانىڭ جاناشىر اعالارىنىڭ ءبىرى، مەملەكەتتىك سىيلىقتىڭ لاۋرەاتى اكىم تارازي.

ەستەلىك تاقتانىڭ اشىلۋ سالتاناتىنا ەل اعالارى دا اتباسىن بۇرعانىن ايتا كەتسەك دەيمىز. ولاردىڭ قاتارىندا مەملەكەت جانە قوعام قايراتكەرى ومىربەك بايگەلدي، ءماجىلىس دەپۋتاتى ورازكۇل اسانعازى، سەناتور ءبىرعانىم ايتىموۆا، «ەگەمەن قازاقستان» رگ» ا ق پرەزيدەنتى ساۋىتبەك ابدراحمانوۆ، س. سەيفۋللين مۇراجايىنىڭ ديرەكتورى، بەلگىلى اقىن نەسىپبەك ايت ۇلى، ايتۋلى جىر ءدۇلدۇلى سەرىك تۇرعىنبەك ۇلى مەن وڭايگۇل تۇرجان بار.

الاشتىڭ اقىن قىزىنا دەگەن ىزگى ءىلتيپاتتارىن اعالارى اعىنان جارىلا سوزبەن جەتكىزسە، ولەڭ ولكەسىندە وكشەسىن باسقان ءىنى- سىڭلىلەرى جىرمەن جولدادى. تاقتانىڭ لەنتاسىن قيۋ قۇرمەتىنە اكىم تارازي مەن ومىربەك بايگەلدي يە بولدى، دەپ جازادى «ەگەمەن قازاقستان» باسىلىمى.