كەڭسەدەگى جاتتىعۋ: ءتيىمدى ءارى ىڭعايلى

 استانا. قازاقپارات - بۇگىندە ءبىز جىلدامدىقتان اجىراپ بارامىز. كوپ نارسەگە ۇلگەرمەيمىز دەگەن جەلەۋمەن ومىردەگى ەڭ ماڭىزدى نارسەنى كەيىنگە ىسىرا بەرەمىز.

ال وزىمىزگە وتە از ۋاقىت بولگەن سوڭ، دەنساۋلىق پەن سىمبات تا سەتىنەي بەرەدى. ال تاڭعى ساعات 8-دەن باستاپ 10 ساعات بويى كەڭسەدە وتىرۋ ارقىلى ءبىز دەنساۋلىقتى مۇلدە قۇرتىپ جاتقانىمىزدى سەزە بەرمەيمىز.

ارقامىزدىڭ بۇكىرەيىپ بارا جاتقانى دا سودان. ءبىزدىڭ كوزىمىز بەن يىعىمىز، موينىمىز بەن اياعىمىز جانە باسقا دا دەنە مۇشەلەرىمىز ءۇشىن قوزعالىس اۋاداي قاجەت. ال كەڭسەدە دەنە قوزعالىسىن قالاي جاساۋعا بولادى.

كەڭسەدە جاتتىعۋ جاساۋ ۇلگىلەرى

جۇمىس بولمەڭىزدەن شىقپاي- اق، دەنساۋلىقتى ساقتاپ، سىمباتتى ارتتىرۋعا بولادى. نازارلارىڭىزعا ەڭ پايدالى ءارى ەڭ قاراپايىم جاتتىعۋلاردى ۇسىنامىز. ءسىز بۇل قيمىلداردى جۇمىس ورنىڭىزدان الشاقتاماي تۇرىپ ورىنداي الاسىز:

- بۇل جاتتىعۋ ايەلدەر قاۋىمىنا قاتتى ۇناۋى مۇمكىن. سەبەبى، ول بەلگە ارنالعان جاتتىعۋ. كەڭسەدەگى ورىندىقتىڭ ءبىر ورىندا شىر اينالاتىن قاسيەتىن پايدالانىڭىز. ۇستىڭگى تاقتايدىڭ شەتىنەن ۇستاڭىز دا، ورىندىقتان تۇرماي، ەكى اياعىڭىزدى قىسىپ، ءسال بۇككەن كۇيدە ەدەننەن كوتەرىڭىز. دەنەڭىزدى تومەنشى بولىگىن الدىمەن وڭعا، كەيىن سول جاققا بۇرىڭىز، جاتتىعۋ كەزىندە باسىڭىز بەن يىعىڭىزدىڭ قوزعالماۋىن قاداعالاڭىز. الدىمەن بۇل قيمىلدى 30 رەت قايتالاڭىز. مۇنداي جاتتىعۋ ءسىزدىڭ دەنەڭىزدىڭ سىمباتتى ءارى تىك بولۋىنا كومەكتەسەدى. سەبەبى، يىق پەن جامباستاعى بۇلشىق ەتتەردى شىنىقتىرۋ وسىعان اكەلەدى. ونىڭ ۇستىنە، ءسىزدىڭ ارىپتەستەرىڭىزدى دە ءبىراز كوڭىلدەندىرىپ جىبەرمەك.

- ودان بولەك، بۇل جاتتىعۋ قولداعى بۇلشىق ەتتەردى، اسىرەسە، ءۇش باستى بۇلشىق ەتتى جاتتىقتىرادى. ۇستەلدە وتىرىپ، ءسال ارتقا شەگىنىڭىز دە، شىنتاق تىرەگىشكە قولدى تىرەپ، جامباسىڭىزدى ءسال كوتەرىڭىز. قولدى بۇگىپ، وتجيمانيە جاساڭىز. 15 رەت جاساعان سوڭ، ءسال دەمالىڭىز. ءۇش رەتتەن قايتالاڭىز.

- ىشتە ارتىق مايدىڭ بولماۋىن اركىم ارماندايدى. ءتىپتى، جاتتىعۋ زالىندا ساعاتتاپ تەر توگۋ ارقىلى دا مايدى كەتىرە المايتىندار بار. ول ءۇشىن بۇلشىق ەتتى جاقسىلاپ جاتتىقتىرۋ كەرەك. كەڭسەدە ىشكە جاتتىعۋ جاساۋ ءادىسى وتە تانىمال بولىپ كەلەدى. ال ونى ورىنداۋ وتە وڭاي. ورىندىقتا وتىرىڭىز دا، وتىرعىشپەن قولىڭىزدى تىرەڭىز. تىزەڭىزدى بۇگىپ، جاتتىعۋ جاساۋعا كىرىسىڭىز. 20 رەت قايتالاڭىز. ەگەر بۇل جاتتىعۋدى كۇنىنە ءتورت رەت قايتالايتىن بولساڭىز، پايداسى بولادى.

- بۇل جاتتىعۋ شىمىر بولۋعا، سونداي- اق، ساندى شىنىقتىرۋعا كومەكتەسەدى. ورىندىقتا وتىرعان كەزدە، الاقانىڭىزبەن وتىرعىشتى تىرەڭىز. الاقاندارىڭىز سانىڭىزدىڭ ورتاسىندا تۇرۋى قاجەت. تىزەڭىزدى سوزىپ، اياعىڭىزداعى بۇلشىق ەتتەرگە كۇش تۇسىرە وتىرىپ جاتتىعۋ جاساڭىز. سوزىلعان تىزەڭىزدى 4-5 مينۋت بويى ۇستاپ وتىرىڭىز دا، كەيىن اياقتارىڭىزدى قوسىڭىز، جاتتىعۋدى 15-20 رەت قايتالاڭىز.

اتالعان دەنە جاتتىعۋىنىڭ كومەگىمەن ءسىز سانىڭىزدىڭ ىشكى جاعىن قاتايتا تۇسەسىز. ول ءۇشىن جۇدىرىعىڭىزدى ءتۇيىپ، ەكى سانىڭىزدىڭ اراسىنا قويىڭىز. قولىڭىزدى جان- جاققا جىبەرۋگە تىرىسىڭىز. الايدا، قولدارىڭىز ءبىر -بىرىمەن قابىسپاۋى كەرەك. ال تىزەڭىزدى بۇلشىق ەتكە كۇش تۇسىرە وتىرىپ، تىزەڭىزدى تومەن ءتۇسىرىڭىز. بۇل جاتتىعۋدى 10-15 رەت قايتالاڭىز. ال سانىڭىزدىڭ الدىڭعى جاعىنداعى بۇلشىق ەتتى شىنىقتىرۋ ءۇشىن كەزەك- كەزەگىمەن وڭ، كەيىن سول اياعىڭىزدى سوزىڭىز. اياقتارىڭىز ەدەنگە پارەللەل بولۋى ءتيىس.

وزدەرىڭىز دە بايقاعان بولارسىزدار، بۇل وتە قاراپايىم جاتتىعۋلار. ولاردى كەڭسەدە ورىنداۋ تۇك تە قيىن ەمەس. ەگەر جىگەرىڭىز بەن ىنتاڭىز، شەشىمتالدىعىڭىز بولسا، جۇيەلى تۇردە بۇل جاتتىعۋلاردى ورىنداپ، ءوز سىمباتىڭىزدى جاقسارتا تۇسەسىز. ارىپتەستەرىڭىزدى دە فيتنەسپەن شۇعىلدانۋعا شاقىرىڭىز. وسىلايشا، ءسىز كەڭسەدەگى ءبىر بىرىنەن اۋمايتىن كۇندەرىڭىزدى تۇرلەندىرە الاسىز، سونداي- اق، دەنەڭىز شىنىعىپ، كوڭىل كۇيىڭىز كوتەرىڭكى بولادى.