گرەكيادا الەمنىڭ جەتى كەرەمەتىنىڭ ءبىرىن قايتادان قالپىنا كەلتىرمەك
جوبانىڭ باس ساۋلەتشىسى اريس پاللاستىڭ ايتۋىنشا، جاڭا كولوسس گرەك ەكونوميكاسىنىڭ قالپىنا كەلتىرىلۋىن بەينەلەۋى ءتيىس.
«ءبىز گرەكيا قايتادان اياعىنا تۇرا الاتىنىن كورسەتكىمىز كەلەدى، ەكونوميكانى قايتا قالپىنا كەلتىرۋگە ەلدىڭ كۇشى جەتەدى»، - دەدى پاللاس.
ساۋلەتشىلەردىڭ پايىمداۋىنشا، جاڭا ءمۇسىن ءتۇپنۇسقاسىنداعىدان بەس ەسە ۇلكەن بولىپ، بيىكتىگى 135 مەترگە جەتپەك. مونۋمەنت بۇرىنعى ورنىنا، رودوس پورتتىق قالاسىنىڭ قويناۋىنا كىرەر جەرگە ورناتىلادى، قالاعا كىرەتىن كەمەلەر ەجەلگى داۋىردەگى سياقتى الىپ ءمۇسىننىڭ اياقتارىنىڭ اراسىنان وتەدى، دەپ حابارلادى moya-planeta.ru.
«ءبىز ەجەلگى كولوسستىڭ كوشىرمەسىن قايتالامايمىز. ءبىز ونى جەتىلدىرىپ، سيمۆولدىق بەينەگە اينالدىرامىز. ءبىز بۇكىل الەمنەن ادامي جانە قارجىلىق رەسۋرستاردى ىسكە قوسامىز. ءسويتىپ، ول جاھاندانۋ سيمۆولى بولادى جانە سونىمەن قاتار ەجەلگى كولوسسپەن بايلانىستى گرەك مادەني داستۇرلەرىن جاڭعىرتامىز»، دەيدى پاللاس.
ءمۇسىن قولا تۇستەس كۇن باتارەيالارىمەن جابدىقتالادى. كولوسس ىشىندە ەجەلگى مۇراجاي جانە كىتاپحانا بولماق. ونى جاساۋشىلاردىڭ ەسەبىنشە، ءمۇسىندى تۇرعىزۋ 250 ميلليون ەۋروعا تۇسپەك. بۇل قارجى شامامەن جەتى جىلدا ءوزىن اقتايدى: جوبا اۆتورلارىنىڭ ەسەبىنشە، كولوسس تۋريستەردى تارتۋ ەسەبىنەن جىلىنا 35 ميلليون ەۋروعا تارتا تابىس اكەلمەك.
ازىرگە جوبانى قارجىلاندىرۋ كوزدەرى انىقتالعان جوق. ساۋلەتشىلەر ونى جۇزەگە اسىرۋ ءۇشىن جەكە دەمەۋشىلەردى جانە مەملەكەتتىك بيۋدجەتتەن قارجى تارتپاقشى.
رودوستاعى كولوسس - ەجەلگى گرەكتىڭ كۇن قۇدايى - گەليوستىڭ الىپ ءمۇسىنى، ول گرەكيادا، ەگەي تەڭىزىندەگى وسىمەن اتتاس ارالداعى رودوس پورتتىق قالاسىندا بولعان. ول الەمنىڭ جەتى كەرەمەتىنىڭ ءبىرى. ونىڭ بيىكتىگى شامامەن 36 مەتر بولدى. كولوسس 65 -جىل تۇردى. ءبىزدىڭ جىل ساناۋىمىزعا دەيىنگى 222- نەمەسە 226- جىلى رودوستاعى جەر سىلكىنىسى سالدارىنان قيرادى.
