قازاق كاسىپكەر ونداعان ميلليون دوللارلىق بيزنەسىن ەڭبەك ۇجىمىنا تاراتىپ بەرمەك

استانا. قازاقپارات - قازاقستاندىق ءىرى كاسىپكەرلەردىڭ ءبىرى بارلىق مەڭدىعازيەۆ ءوز بيزنەسىن ەڭبەك ۇجىمىنىڭ يەلىگىنە بەرۋدى جوسپارلاۋدا.

بۇل تۋرالى ءوزىنىڭ فەيسبۋكتەگى پاراقشاسىندا تانىمال زاڭگەر جانگەلدى سۇلەيمەنوۆ ءمالىم ەتتى.

 بۇل قازاقستان تاريحىندا العاش ورىن الايىن دەپ وتىر. ب. مەڭدىعازيەۆ بيزنەستى قاراپايىم جۇمىسشىلارعا بەرۋگە قاتىستى بارلىق زاڭدىق ۇدەرىستەردى سوڭىنا جەتكىزۋدى تولىعىمەن زاڭگەر ج. سۇلەيمەنوۆكە تاپسىرعان. "بۇل قازاقستان تاريحىندا بۇرىن- سوڭدى بولماعان وقيعا.

بارلىق مەڭدىعازيەۆ ءوزىنىڭ بيزنەسىن ەڭبەك ۇجىمىنا بەرۋدى جوسپارلاۋدا. بارلىق پەن ونىڭ زايىبى نۇريا ءوز كاسىپتەرىن 20 جىل بويى دامىتىپ كەلدى، قازىرگى ۋاقىتتا ول بىرنەشە باعىتتار بويىنشا كاسىپكەرلىكتى دوڭگەلەتۋدە. تاۋەلسىز تالداۋدىڭ ناتيجەسى بويىنشا، ونىڭ بيزنەسى ونداعان ميلليون دوللار تۇرادى. ول ونەركاسىپتىك جانە كەڭسە عيماراتتارى، كولىك، جابدىقتار، ماتەريالدار مەن تەحنولوگيالار. ول جيىرما جىلدىق جۇمىس پەن بىلىكتى ماماندار. بۇل - ءادىل ىسكەرلىك بەدەل. وسىنىڭ بارشاسىن بارلىق پەن نۇريا وسى جىلدارى وزدەرىمەن بىرگە بولعان ادامدارعا تەگىننەن تەگىن بەرمەك»، - دەپ جازادى زاڭگەر.

ونىڭ ايتۋىنشا، مۇنداي تاجىريبە ءالى ەلىمىزدە ورىن العان ەمەس. «جەكە باسىم، قازاقستاندا وسىعان ۇقساس نارسەنىڭ ورىن العانىن بىلمەيمىن. شەت مەملەكەتتەردە مۇنداي كەزدەسىپ جاتادى، ءبىراق ءبىزدىڭ ەلدە بۇل تۇڭعىش رەت بولىپ جاتىر»، - دەپ اتاپ ءوتتى ج. سۇلەيمەنوۆ.

زاڭگەردىڭ سوزىنە قاراعاندا، بارلىق كوپ جىلدار بويى مۇقتاج ادامدارعا كومەكتەسۋمەن كەلەدى. ول جەتىمدەر ءۇيىنىڭ بۇلدىرشىندەرىنە ۇلكەن كومەك كورسەتۋگە ىنتىق. «ەندى بارلىق پەن نۇريا ءوز قىزمەتكەرلەرىنە وسىلاي كومەكتەسۋدى ءجون ساناپ وتىر. ب ق و اقساي قالاسىندا 29 -جەلتوقساندا 9:30 ساعاتتا ەڭبەك ۇجىمىنىڭ جينالىسى وتەدى. سول جەردە بارلىق ءوز شەشىمىن جاريا ەتپەك. (...) بارلىق پەن نۇريا ماعان وسى كەلىسىمنىڭ زاڭدىق قىرىن جۇرگىزۋدى سۇرادى»، - دەيدى ج. سۇلەيمەنوۆ.

ناقتىلاي كەتسەك، قازىرگى ۋاقىتتا بارلىق مەڭدىعازيەۆتىڭ «KSS» ج ش س كاسىپورنى 50 ميلليون دوللارعا باعالانىپ وتىر.

اۆتور: جاسۇلان جولدىبايەۆ