ۆەناداعى روجدەستۆو جارمەڭكەسى - فوتو

ۆەنا. قازاقپارات - روجدەستۆو - حريستياندىق ماڭىزدى مەرەكەلەردىڭ ءبىرى. باتىس ەۋروپا، سولتۇستىك جانە وڭتۇستىك امەريكا، افريكا، ازيا، اۆستراليادا تۇراتىن كاتوليكتەر ونى 25- جەلتوقساندا اتاپ وتەدى.

كاتوليك الەمى ورتالىقتارىنىڭ ءبىرى - ۆەنا روجدەستۆو كەزەڭىندە ەۋروپانىڭ ەڭ كوركەم، سالتاناتتى قالالارىنىڭ بىرىنە اينالادى. ءبىزدىڭ ارنايى ءتىلشى اۆستريا استاناسىنان ارنايى رەپورتاج ۇسىنادى.

ەڭ ءىرى جارمەڭكە ۆەنادا قالالىق راتۋشا ساياباعىنداعى باس الاڭدا ورنالاسقان. رەسمي دەرەكتەرگە سۇيەنسەك، مەرەكەلىك كەزەڭدە وعان كۇن سايىن 60 مىڭعا جۋىق ادام بارادى. ۇلكەن شىرشا، اسەم بەزەندىرىلگەن كوشە شىنىمەن دە ەرتەگى الەمىن ەسكە سالادى.

جارمەڭكەدە ادەمى كادەسىيلار، جاڭا جىلدىق ويىنشىقتار ساتىپ الۋعا بولادى. قۋىرىلعان تالشىن ءدامىن تاتىپ كورۋ ۇسىنىلادى. ول ءتاتتى ءارى پايدالى. سونداي-اق اۆستريالىق كارتوپ پەن قىشقىل قىرىققابات ساتىلادى.