تارازدىق ستۋدەنت سامبودان ازيا چەمپيونى اتاندى

استانا. قازاقپارات - تاراز مەملەكەتتىك پەداگوگيكالىق ينستيتۋتىنىڭ ستۋدەنتى بەكادىل شايمەردەنوۆ سپورتتىق جانە اسكەري سامبودان جاستار اراسىندا وتكەن اشىق ازيا چەمپيوناتىندا جەڭىمپاز اتانىپ، التىن مەدالعا يە بولدى.

بۇل تۋرالى اتالعان ءبىلىم ورنىنىڭ باسپا ءسوز قىزمەتى حابارلادى.

اتىراۋ قالاسىندا وتكەن حالىقارالىق دەڭگەيدەگى بايراقتى باسەكەگە ەلىمىزدىڭ بارلىق ايماعىنان جانە وزبەكستان، قىرعىزستان، اۋعانستان، موڭعوليا، تاجىكستان، ءۇندىستان، مالايزيا، يران جانە وڭتۇستىك كورەيا مەملەكەتتەرىنەن كەلگەن 250 گە جۋىق بالۋان قاتىسىپ، باقتارى مەن باپتارىن ءھام كۇشتەرىن سىنادى.

فينالدا ب. شايمەردەنوۆ مالايزيالىق سپورتشىدان باسىم ءتۇسىپ، جەڭىس تۇعىرىنا كوتەرىلدى. ونىڭ جاتتىقتىرۋشىسى - رامازان قوجاتايەۆ.

ايتا كەتەيىك، 18 جاسار بالۋان بۇعان دەيىن 2014-جىلى سامبودان وڭتۇستىك كورەيا جانە وزبەكستاندا وتكەن الەم چەمپيوناتىندا III ورىنعا يە بولعان ەدى.

اۆتور: مارلان جيەمباي