پوليتسيا كوبىنەسە ەسىرتكى ساتۋشىلارمەن ەمەس، ەسىرتكى تۇتىنۋشىلارمەن كۇرەسىپ ءجۇر - پروكۋراتۋرا
بۇگىن استانا قالاسى اكىمدىگىندە پروكۋراتۋرا جانىنداعى زاڭدىلىقتى قامتاماسىز ەتۋ جونىندەگى قوعامدىق كەڭەستىڭ وتىرىسىندا قالا پروكۋرورىنىڭ كومەكشىسى رۋسلان ءايتىموۆ وسىلاي مالىمدەدى.
پروكۋراتۋرانىڭ مالىمەتىنە قاراعاندا، استانادا 2 مىڭنان استام ناشاقور رەسمي تىركەۋگە الىنعان.
«قالادا ۇزاق ۋاقىت بويى ەسىرتكى ساتۋمەن اينالىساتىن تۇتاستاي توپتار بار ەكەن ەشكىمگە دە قۇپيا ەمەس. مۇندا مۇددەللىك تانىتىپ جۇرگەن ۇيىمداسقان قىلمىستىق توپتاردىڭ جىمىسقى ارەكەتتەرى دە بەسەنەدەن بەلگىلى، ال ءبىراق ولارعا قارسى ەشقانداي دا ناتيجەلى جۇمىس اتقارىلماي كەلەدى. ىشكى ىستەر ورگاندارىنىڭ وسى باعىتتاعى ارەكەتتەرىن باعالاي وتىرىپ، ءبىز ولاردىڭ قىزمەتى ەسىرتكى ساتۋشىلارمەن كۇرەسكە ەمەس، ەسىرتكىنى تۇتىنۋشىلارىمەن كۇرەسكە باعىتتالعان با، دەگەن ويدا قالامىز»، - دەدى ر. ءايتىموۆ.
ونىڭ سوزىنە قاراعاندا، سوڭعى ۋاقىتتا استانا قالاسى بويىنشا ەسىرتكى زاتتارىنىڭ ءترانزيتى جانە سوعان بايلانىستى وقيعالار كورسەتكىشى ارتىپ وتىر.
«زاڭسىز اينالىمدا جۇرگەن گەروين سەكىلدى ەسىرتكى زاتتارىنىڭ جالپى مولشەرىنىڭ تەك 1 پايىزى عانا قۇقىق قورعاۋ جانە ارنايى ورگاندارمەن تاركىلەنەتىنى تۋرالى فاكتىنىڭ ءوزى وسىنى راستايدى. بۇدان بولەك، پروكۋراتۋرا جانە باسقا دا قۇقىق قورعاۋ ورگاندارىمەن ەسىرتكىنىڭ زاڭسىز اينالىمىنا، سونىڭ ىشىندە زاڭسىز تاسىمالداردى جۇزەگە اسىراتىن ۇيىمداسقان قىلمىستىق توپپەن كۇرەسكە قارسى 2015-جىلعى بىرلەسە اتقارىلعان جەدەل الدىن الۋ شارالارى ءتيىستى دەڭگەيدە اتقارىلعان جوق»، - دەيدى ر. ءايتىموۆ.
ونىڭ سوزىنە قاراعاندا، بۇعان باستى سەبەپتەردىڭ ءبىرى ەسىرتكىگە قارسى كۇرەس باسقارماسى جۇمىسىنىڭ دۇرىس جولعا قويىلماعاندىعىندا بولىپ وتىر.
اۆتور: قانات مامەتقازى ۇلى
