ق ر مادەنيەت جانە سپورت ءمينيسترى قازاقستاندىق زىلتەمىرشىلەر اينالاسىنداعى داۋ-دامايعا قاتىستى تۇسىنىك بەردى

استانا. قازاقپارات - بۇگىن «قازاقپارات» تىلشىسىنە بەرگەن سۇحباتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى قازاقستاندىق زىلتەمىرشىلەر اينالاسىنداعى تۋىنداعان داۋ-دامايعا قاتىستى تۇسىنىكتەمە بەردى.

«ءبىز قازىر مينيسترلىك جانىنان قازاقستاننىڭ اۋىر اتلەتيكا فەدەراتسياسىمەن بىرلەسە وتىرىپ كوميسسيا قۇردىق. سەبەبى، بۇل وقيعا بارشامىزدى الاڭداتىپ وتىر. الايدا، بۇل الدىن الا دياگنوز، ياعني سوڭعى شەشىم ەمەس. ارينە، ءبىز قازىرگى كەزدە اپەللياتسياعا بەرۋدەمىز. ءاربىر سپورتشى ءدارى-دارمەككە قوسىمشا تەستىلەۋدەن وتەتىنى بەلگىلى»، - دەپ توقتالدى مينيستر.

وسى ورايدا ۆەدومستۆو باسشىسى ەگەر دە سپورتشىلاردىڭ دوپينگتى قابىلداۋ فاكتىسى دالەلدەنسە، وندا اتلەتتەردى ءدارى-دارمەكتەردى قابىلداۋعا تارتقان اعا باپكەرلەر جازالاناتىنىن قاداپ ايتتى.

«ويتكەنى، بۇندايعا مۇلدەم جول بەرىلمەۋى كەرەك. ءبىز سپورتتىڭ تازا بولعانىنا، جوعارى ناتيجەلەر سپورتىنا باسىمدىق بەرىپ وتىرمىز»، - دەدى ا. مۇحامەدي ۇلى.

سونىمەن قاتار مينيستر بۇگىندە اۋىر اتلەتيكادا ءاربىر سالماق دارەجەسىندە بىرنەشە تالانتتى جاستار بار ەكەنىن اتاپ ءوتتى. «ءبىز ءۇشىن سپورتتىق دەرجاۆا رەتىندە قازاقستان نامىسىن ساقتاۋ وتە ماڭىزدى»، - دەدى ول.

بۇدان بولەك، ۆەدومستۆو باسشىسى دوپينگتى پايدالانۋدا كۇدىككە ىلىنگەن سپورتشىلاردىڭ الدىن الا تىزىمىندە 17 ادام بار ەكەنىن، ونىڭ ىشىندە ۇشەۋى - قازاقستاندىقتار.

«بۇل ءبىرىنشى ءتىزىم، سونىمەن قاتار قوسىمشا تىزىمدەر بولاتىندىعى ايتىلدى. بۇلار دارىلىك پرەپاراتتاردى پايدالاندى دەپ كۇدىككە ىلىنگەندەر. قالاي بولعاندا دا ءبىز بارلىعىن تىڭعىلىقتى تالداۋدان وتكىزۋىمىز كەرەك. الدا ريو دە جانەيروداعى وليمپيادا ويىندارى بار. قازاقستان لوندوندا جاقسى جەتىستىكتەرمەن كورىندى. سوندىقتان ءبىز بۇل الەۋەتىمىزدى جوعالتپاي، ونى ەسەلەي ءتۇسۋىمىز شارت»، - دەپ ءتۇيدى مينيستر.

بۇدان بۇرىن حابارلانعانداي، ق ر اۋىر اتلەتيكا فەدەراتسياسى ا. وتەشوۆ پەن ج. قىدىربايەۆتان دوپينگ انىقتالۋى فاكتىسىنە قاتىستى مالىمدەمە جاسادى. 2015-جىلدىڭ 24- جەلتوقسانىندا حالىقارالىق اۋىر اتلەتيكا فەدەراتسياسىنىڭ (IWF) دوپينگ-قاداعالاۋ بويىنشا زەرتحانالىق تالداۋلار ناتيجەسى نەگىزىندە قازاقستاندىق سپورتشىلار - الماس وتەشەۆتى، جاسۇلان قىدىربايەۆتى جانە ەرمەك ءومىرتايدى ۋاقىتشا سپورتتان شەتتەتۋ شەشىمىن شىعاردى. ياعني ولار دوپينگكە قارسى ەرەجەنى بۇزۋى مۇمكىندىگىنە بايلانىستى حالىقارالىق جارىستارعا ۋاقىتشا جىبەرىلمەيتىن بولادى.

2015-جىلى حيۋستوندا الەم چەمپيوناتىنان كەيىن سپورتشىلاردان الىنعان دوپينگ-قاداعالاۋدىڭ «ا» سىنامالارىندا تىيىم سالىنعان انابوليتيكالىق اندروگەندىك ستەرويد انىقتالدى.

«اتالعان فاكتىگە بايلانىستى ءتيىستى ۆەدومستۆولار مەن قازاقستاندىق فەدەراتسيانىڭ ىشكى تەكسەرۋ شارالارىن جۇرگىزۋى جوسپارلانىپ وتىر»، - دەپ اتاپ وتىلگەن فەدەراتسيا مالىمدەمەسىندە.

ونىڭ ناتيجەسى بويىنشا «ب» سىناماسىن اشۋعا سۇراۋ جىبەرۋ مۇمكىندىگى تۋرالى جانە اپەللياتسياعا بەرۋ شەشىمى قابىلدانادى.

سونىمەن قاتار IWF تەكسەرۋى دە جالعاسادى. ونىڭ قورىتىندىسى حالىقارالىق اۋىر اتلەتيكا فەدەراتسياسى مەن ق ر اۋىر اتلەتيكا فەدەراتسياسىنىڭ سايتتارىندا حابارلانادى.

اۆتور: رۋسلان عابباسوۆ