انانىڭ قىزىنا جازعان حاتى
وزىڭە ءتيىستى وتباسىڭ بولعان كۇننەن باستاپ، ەرتە تۇرىپ، باسقالار ويانۋدان بۇرىن وتباسىن تاپ- تۇيناقتاي ەتىپ تازالاۋدى ادەت ەت، ايەل بولۋ وڭاي، ال ەل سۇيىنەتىندەي، ەرى سۇيەتىندەي ايەل بولۋ ماشاقاتتى شارۋا.
ول ءۇشىن، تىنباي قۇلشىن قىزىم، ەرتەڭگى يبالى كەلىن، اسىل جار، اياۋلى انا بولۋ ءۇشىن بۇگىننەن باستا، مەنىڭ الدىمنان باستا. شەشەڭ بىلگەنىن ءومىر بويى قۇلاعىڭا قۇيىپ كەلەدى، ەرتەڭگى كۇندەردى پاك نيەتىڭمەن كۇتىپ ال، نيەتىڭ تازا بولماسا، ىستەگەن ءىسىڭنىڭ دە، ۇستاعان ءۇيىڭنىڭ دە بەرەكەسى بولمايدى. ەركەلىگىڭدى، بالالىعىڭدى، اڭقاۋلىعىڭدى بارلىعىن تۋىپ- وسكەن وسى ۇيگە قالدىرىپ كەت.
اقىلدى قىزىم!
ايەلدىڭ ەكىنشى تازالىعى ەرىنىڭ كيىمىنەن بىلىنەر، قۇداي قوسقان جان جولداسىڭنىڭ كيىمىن رەتتەپ، جاعالى كيىمدەرىن قاستەرلەپ ۇستا، ەرىڭدى قۇرمەتتەۋدى ونىڭ كيىمىنەن باستاساڭ، ەل الدىندا قۇرمەتى ارتادى. انا- مىنا جەردە يلەكتەنىپ، كىر بولىپ، اياق استىندا قالماسىن. ەرىڭدى قۇرمەتتەگەنىڭ ەرتەڭگى ۇرپاعىڭنىڭ ساعان جاسار سىيى دەپ ءبىل. سىرتقا شىعا قالسا جاعا- جەڭىن تاپ- تازا ەتىپ، جىلى قاباقپەن شىعارىپ سال، ول كەلگەندە كۇلىپ قارسى الاتىن بول!
ەرىڭنىڭ الدىندا ورىنسىز اشۋلانبا، ايعايلاپ سويلەمە، ءار ۋاقىت اقىلىڭدى عانا وزىڭە سەرىك ەت. التىن قىزىم! ايەلدىڭ ءۇشىنشى تازالىعى جاتار ورىننىڭ تازالىعىنان بىلىنەر، ورىن كورپەڭدى ۇنەمى دالاعا جايىپ، جۋىپ- شايىپ تازا ۇستا، وسى ىستەر قاراپايىم عانا بولعانىمەن كوپ ادامنىڭ قولىنان كەلە بەرمەيدى. ادەتتە مۇنتازداي جۇرەتىن كەيبىر جاندار وسىعان ءمان بەرمەيدى.
ال، قىزىم، ەڭ الدىمەن تازا بول، ءار كۇنىڭدى تاپ- تازا، كوڭىلدى وتكىز، قىسىر كەڭەسكە بوي ۇرما، بارعان جەرىڭدە اقىلدى دا، يبالى بول!
اناسى قالاي، اتاسى قالاي دەمەسىن، اقىلىڭدى عانا وزىڭە سەرىك ەت! ال، قىزىم باقىتتى بول، كوڭىلدى بول، ماڭگى جارقىراپ- جايناپ جۇرە بەر!
قۇرمەتپەن: اياۋلى اناشىڭ...
لايليم يگيليكتىڭ VK جازباسىنان
