ەلىمىزدىڭ بارلىق وڭىرىندە «س ك- فارماتسيا» ءدارى-دارمەك ساقتايتىن قويمالار ۇيىمداستىرماق

بۇل تۋرالى بۇگىن اتالعان سەرىكتەستىكتىڭ كەڭەيتىلگەن وتىرىسى بارىسىندا كومپانيا باسقارماسى ءتوراعاسىنىڭ ورىنباسارى ماكسيم كاساتكين ايتتى.
«استانا مەن الماتى قالالارىندا، وبلىس ورتالىقتارىندا ءدارى-دارمەكتىڭ ازايمايتىن قورىن قۇرۋ قاجەت.
بۇل ماسەلە كەشەندى شەشىمدەردى تالاپ ەتەدى. بىرىنشىدەن، بۇگىنگى كۇنى بىزدەگى اۋتسورسينگتە الماتى، اقتوبە، قاراعاندى، قوستاناي جانە شىمكەنت قالالارىندا 5 نەگىزگى قويما بار. وسى قويمالاردا ءبىز ترانزيتتىك قويمالاردىڭ كومەگىمەن رەسپۋبليكانىڭ بارلىق باسقا وڭىرلەرىنە مەديكامەنتتەردى جەتكىزۋدى قامتاماسىز ەتەمىز. 2016-2019-جىلدارى ىشىندە ءبىز مۇنداي قويمانى بارلىق 16 وڭىردە قۇرۋعا نيەتتەنۋدەمىز»، - دەدى ول.
م. كاساتكيننىڭ ايتۋىنشا، اتالعان قويمالاردا ءدارى-دارمەكتەردىڭ تاۋسىلمايتىن قورى ساقتالاتىن بولادى.
«ەكىنشىدەن، جوسپارلاۋ دەنساۋلىق ساقتاۋ ۇيىمدارىندا 2 ايعا جەتەتىندەي قور قالىپتاستىرۋ مۇمكىنشىلىگىمەن جۇزەگە اسىرىلۋى ءتيىس»، - دەدى باسقارما ءتوراعاسىنىڭ ورىنباسارى.
ۇشىنشىدەن، ونىڭ سوزىنە قاراعاندا، ءدارى-دارمەكتىڭ ازايمايتىن قورىن قالىپتاستىرۋ ءبىرىڭعاي ديستريبيۋتوردىڭ قارجىسى ەسەبىنەن جۇزەگە اسىرىلۋى قاجەت.
اۆتور: مارلان جيەمباي