دوپينگ داۋى: وليمپيادا چەمپيونى بولاتىن تۇڭعىش قازاق جايلى ارمانىمىز كەيىنگە قالدى
اۋىر اتلەتيكادان قازاقستان قۇراماسىنىڭ باس باپكەرى الەكسەي ني اۋىراتلەتتەر الماس وتەشوۆتىڭ، جاسۇلان قىدىربايەۆتىڭ جانە ەرمەك ءومىرتايدىڭ دوپينگ داۋىنا قاتىستى ۋاقىتشا شەتتەتىلۋىنە تۇسىنىك بەردى، - دەپ حابارلايدى Vesti.kz.
الەكسەي ني دوپينگ-سىناقتارىنىڭ قورىتىندىلارىنا كۇماندانىپ وتىرعانىن ايتتى. «بۇل جىگىتتەر كەشەگى بالالار ەمەس، قىدىربايەۆ - الەم چەمپيونى، وتەشوۆ جىل سايىن كۇمىس جۇلدەگەر بولادى - الەم چەمپيوناتىندا ەكى رەت جانە ازيا ويىندارىندا. بۇل سپورتشىلاردىڭ دەڭگەيى جوعارى، ءبىز ولاردى حيۋستونداعى جارىسقا التىن مەن كۇمىس مەدالدار الادى دەپ دايىندادىق. سپورتشىلارىمىزدى دوپينگسىز جانە وسىنداي داۋسىز دايىنداۋعا ميىمىز جەتپەي مە سوندا؟ لوگيكا بولۋى كەرەك قوي. سوندا رازيموۆ پەن زايچيكوۆ نەگە ۇستالمادى؟ ءبىز ءبىر كوماندامىز، بىرگە دايىندالدىق، سوندىقتان سۇراق كوپ. ۇشتىككە كىرە الماعان قاتارداعى سپورتشىلار ۇستالدى دەسە ءبىر ءجون، ال بۇل جىگىتتەر مەدال الۋعا دايىن، بۇل نونسەنس. باسشىلىقتىڭ نە شەشەتىنى 28- جەلتوقساندا بەلگىلى بولادى»، - دەدى الەكسەي ني باسىلىمعا بەرگەن سۇحباتىندا.
سونىمەن قاتار، باس باپكەر بۇدان قالاي قورعانۋ كەرەكتىگىن جانە قانداي الدىن الۋ شارالارىن جۇرگىزۋ كەرەك ەكەندىگىن ءتۇسىندىردى. ايتۋىنشا، جىگىتتەردىڭ ەكىنشى سىناعىنىڭ قورىتىندىسىن جاريا ەتۋ قاجەت. سويتسەك، بارلىق سىناما امەريكادا الىنعان، ولاردى فەدەراتسيا مونرەال زەرتحاناسىنا جىبەرگەن. «جىگىتتەر بۇل باقىلاۋدان ءاردايىم ءوتىپ ءجۇردى. ءتىپتى قىدىربايەۆقا تاڭعى جەتىدە كەلىپ، سىناق الىپ كەتكەن. ءبىز ءتىپتى الەمدەگى ەڭ ۇزدىگى سانالاتىن كەلن زەرتحاناسىندا تەكسەرىلدىك. مونرەالداعى زەرتحانانى بىلمەيمىن، ءبىراق كەلن ءالى كۇنگە ەڭ مىقتىسى بولىپ سانالادى. بۇل مەرسەدەستى ەكونوم كلاسسىنداعى كولىكتەرمەن سالىستىرۋ سياقتى»، - دەپ ءتۇسىندىردى ني ءوز ءسوزىن.
نيدىڭ ايتۋىنشا، ەندى قول قۋسىرىپ وتىرماۋ كەرەك. وسىعان بايلانىستى ول قازاقستان اۋىر اتلەتيكا فەدەراتسياسىنىڭ تاراپىنان بەلگىلى ءبىر قادامدار جاسالۋى كەرەكتىگىن ايتىپ ءوتتى. «(...) ادامي فاكتوردى دا ەسەپكە الۋ قاجەت ءارى سىناق الاتىن مامانداردىڭ ءبىلىمىن قاراۋ كەرەك. سوندىقتان مۇمكىندىگىنشە رەسۋرستاردى، زاڭداردى قولدانۋىمىز قاجەت. (...) قىدىربايەۆ پەن وتەشوۆ -الەمدىك دەڭگەيدەگى سپورتشىلار. جارتى جىلدان كەيىن ولار ريودا ەكى مەدال الار ەدى. يلين ەكى مارتە التىن مەدال جەڭىپ العان كاتەگوريادا ءوز ورنىمىزدى ساقتاپ قالۋىمىز كەرەك. بۇل ميعا دا سىيمايتىن جاعداي»، - دەدى ول.
«حيۋستوندى قويشى، ءبىراق ريودا ءبىز جەڭىستى قولدان بەرمەس ەدىك، مەدالداردى ءوزىمىز الار ەدىك. سوندا وليمپيادادا اۋىر اتلەتيكادان التىن مەدال العان تۇڭعىش قازاق بولار ەدى. اۋىر اتلەتيكادان وليمپيادادا تاريحىندا قازاق ەشقاشان التىن مەدال الماعان. قىدىربايەۆ تۇڭعىش الەم چەمپيونى بولدى. (...) كۇرەستە ۇشكەمپىروۆ بار، بوكستا وليمپيادا چەمپيوندارى كوپ، ءبىراق شتانگادا جوق. بىزدە الۋعا مۇمكىندى بولعان ەكى جۇلدىزىمىز بولعان، ءبىراق ول كەيىنگە قالدىرىلدى، قاشانعا دەيىن قالدىرىلعانى دا بەلگىسىز»، - دەپ قورىتىندىلادى الەكسەي ني ءوز ءسوزىن.
ەسكە سالايىق، كەشە قازاقستاندىق ءۇش بىردەي اۋىراتلەتكە دوپينگ قولداندى دەگەن كۇدىك كەلدى. حالىقارالىق اۋىر اتلەتيكا فەدەراتسياسىنىڭ (IWF) قازاقستاندىق تاعى ەكى اۋىراتلەت الماس وتەشوۆ پەن ەرمەك ءومىرتايدى دوپينگ قولداندى دەگەن كۇدىك تۋعانى ءۇشىن ۋاقىتشا شەتتەتتى. ال اۋىر اتلەتيكادان 2014-جىلعى الەم چەمپيونى ءارى 2015-جىلعى قولا جۇلدەگەر جاسۇلان قىدىربايەۆ دوپينگ ءۇشىن ءومىر بويىنا ديسكۆاليفيكاتسياعا ۇشىراۋى مۇمكىن.
