امەريكانىڭ اۋە كۇشتەرى قازاقستان قالالارىن بومبالاماق بولعان

استانا. قازاقپارات - امەريكانىڭ اۋە كۇشتەرى قازاقستان قالالارىن بومبالاماق بولعان.

قارا تىزىمگە ەلىمىزدىڭ 8 ەڭ ءىرى وندىرىستىك ورتالىعى كىرىپتى.

جارتى عاسىر قۇپيا بولىپ كەلگەن مۇنداي مالىمەتتى ا ق ش- تىڭ ۇلتتىق مۇراعاتى جاريالاپ وتىر دەپ حابارلايدى KTK ارناسى.

زىمىرانمەن بومبالاۋ تۋرالى جوسپاردى پەنتاگون وتكەن عاسىردىڭ 50- جىلدارى دايىنداعان. قۇجاتتا اتوم بومباسى تاستالۋى ءتيىس قالا مەن ستراتەگيالىق وبەكتىلەردىڭ سىزباسى دا بەكىتىلگەن ەكەن.

نىساناعا كەڭەس وداعى، شىعىس ەۋروپا مەن قىتاي اۋماعىنداعى جۇزدەگەن شاھار مەن كاسىپورىندار الىنىپتى. ءتىپتى بومبا مەتاللۋرگيالىق كومبينات، قارۋ-جاراق شىعاراتىن زاۋىت، اسكەري بولىمدەر، ءىرى كەنىشتەر ورنالاسقان قازاقستان قالالارىنا دا تاستالماق بولعان. تىزىمدە الماتى، بالقاش، قاراعاندى، قوستاناي، پاۆلودار، ورال، سەمەي مەن وسكەمەن بار.