تەاتر ماقتانىشى - مايرا مۇحامەد قىزى
ايگىلى سوپرانونىڭ دەبيۋتى، تەاتردىڭ ءۇشىنشى ماۋسىمىن اشقان ا. جۇبانوۆ پەن ل. ءحاميديدىڭ «اباي» وپەراسىنىڭ تۇساۋكەسەرىندە اجاردىڭ پارتياسىمەن باستالدى.
قازاقستاندىق وپەرا انشىلەرىنىڭ ىشىندە «گراند وپەرا» ءسوليستى اتانعان ەڭ ءبىرىنشى جانە بۇگىندە جالعىز ورىنداۋشى بولىپ تابىلاتىن ونەر يەسى
دج. ءپۋچچينيدىڭ «بوگەما» وپەراسىنداعى ميۋزەتتانى ورىنداپ، فرانتسۋزدىق كورەرمەننىڭ جۇرەگىن جاۋلاپ العان بولاتىن. سودان بەرى فرانسيانىڭ
Opera National de Paris, Opera National de Lorraine, Opera National de Bordeaux, Opera de Rennes, Theatre de Caen, Opera National
سياقتى وپەرا تەاترلارى وعان ءوز ساحنالارىن ەرەكشە قۇرمەتپەن ۇسىنادى. ال انگليا، اۆستريا، امەريكا جانە باسقا ەلدەردىڭ مۋزىكا سىنشىلارى مايرا مۇحامەد قىزىن «ءمولدىر داۋىستى ورىنداۋشى» دەپ اتاپ، ول جايلى ۇزدىكسىز ماقالالار جاريالاپ تۇرادى. ءانشىنى پلاسيدو دومينگونىڭ ءوزى 2003 - جىلى ۆاشينگتوننىڭ ۇلتتىق وپەراسىنا ايگىلى ميرەللا فرەنيمەن بىرگە پ. چايكوۆسكيدىڭ «ورلەان قىزى» وپەراسىنداعى اگنەس سورەلدىڭ پارتياسىن ورىنداۋعا شاقىرعان ەدى. سونداي- اق قازاقستاندىق وپەرا ءانشىسى بريتاندىق «كادوگان حوللدا» لوندوننىڭ فيلارمونيالىق وركەسترىمەن بىرگە ءساتتى ونەر كورسەتتى. قىتايدىڭ اتاقتى «دجون شان لي تان» سارايىندا بەرگەن جەكە كونسەرتى مايرا مۇحامەد قىزىنىڭ تانىمالدىلىعىن ارتتىرا تۇسكەنى راس.
دۇنيەجۇزىلىك وپەرا جۇلدىزدارى روبەرتو الانيا، مارسەلو الۆارەس، سەرگەي لەيفەركۋس، كريستينا گاياردو- دومەس، ستيۆەن كوستەللو، بيۋلەنت بەزدۋز سىندى مايتالماندارمەن ءبىر ساحنادا ونەر كورسەتتى.
ول «استانا وپەراعا» شاقىرىلعانعا دەيىن اباي اتىنداعى وپەرا جانە بالەت تەاترىندا جەتەكشى سوليست رەتىندە ەڭبەك ەتتى. «استانا- وپەرا» تەاترىنىڭ باسپا ءسوز قىزمەتىنىڭ حابارلاۋىنشا، ءانشى جاڭا ۇسىنىستى ەرەكشە قۋانىشپەن قابىلداپتى.
- وسى كيەلى ساحنادا العاش ونەر كورسەتكەنىم ەسىمدە. 2013 - جىلدىڭ قازان ايىندا «استانا وپەرا» تەاترىنىڭ الەمدىك تۇساۋكەسەرىنە وراي گالا- كونسەرت وتكەن بولاتىن. ال بيىل قىركۇيەكتە شىعارماشىلىق توپپەن بىرگە
ا. جۇبانوۆ پەن ل. ءحاميديدىڭ «اباي» وپەراسىنىڭ تۇساۋكەسەرىندە جۇمىس جاسادىم. سيمفونيالىق وركەستر مەن حوردىڭ ۇيلەسى كەرەمەت ۇناعان. تەاتردىڭ اكۋستيكاسىنىڭ كەرەمەتتىگىنە ءتانتى بولدىم. ەندى وسى ۇجىمدا ءان سالاتىنىما وتە قۋانىشتىمىن، - دەيدى مەملەكەتتىك سىيلىقتىڭ يەگەرى.
مايرا مۇحامەد قىزى وپەرا وليمپىنە جەتەلەگەن 20 جىلدان استام ۋاقىت ىشىندە ۆوكالدىق شەبەرلىگىن شىڭداپ، ونەردىڭ قىر- سىرىن مەڭگەردى. ونىڭ كۇندە ەڭبەكتەنىپ، رەپەرتۋارىن كەڭەيتۋى، تىنباي جاڭا يدەيالاردى ىزدەۋى ءوز جەمىسىن بەرىپ تە ءجۇر. بۇگىندە كورەرمەننىڭ سۇيىكتىسى، قازاقستاننىڭ ماقتانىشىنا اينالدى. سونىمەن قاتار الەمدىك وپەرا انشىلەرى ءۇشىن كۇردەلى دە، بەدەلدى بولىپ تابىلاتىن ماسكەۋدەگى پ. چايكوۆسكي اتىنداعى حالىقارالىق سايىستا قازاقستاندىق وپەرا انشىلەرىنەن جالعىز مايرا مۇحامەد قىزى عانا لاۋرەات اتانعانىن ايتا كەتۋ كەرەك.
- ونەر شابىتپەن، يدەيامەن، ارمانمەن جانە قالاعانىما جەتسەم ەكەن دەگەن قۇشتارلىقپەن ۇشتاسادى. مەن دە ونەر ادامى رەتىندە وسىنىڭ بارىنە ىنتىقپىن، ارمانىم كوپ. مىسالى، گ. دونيتسەتتيدىڭ «پولك قىزى» كومەديالىق وپەراسىنداعى باستى كەيىپكەر ءماريدى، ۆ. بەللينيدىڭ «ۇيقىداعى ارۋ» وپەرا- مەلودراماسىنداعى امينانى جانە باسقا جاڭا كەيىپكەرلەردى ورىنداعىم كەلەدى. كوزدەگەنىمە جەتۋ ءۇشىن، قازاقستاننىڭ باي وپەرا ونەرىن بۇكىل الەمگە بۇرىنعىدان دا تانىتۋ ءۇشىن «استانا وپەرا» تەاترىنىڭ ساحناسىندا بارىمدى سالىپ تەر توگەتىن بولامىن، - دەيدى مايرا مۇحامەد قىزى.
ءامىرلان ماۋلەن
ايقىن- اقپارات
