جاڭا جىل مەرەكەسىنە وراي كوكشەتاۋدان شىعا بەرىستە جاڭادان سالىنعان ءزاۋلىم قاقپا اشىلدى - فوتو

كوكشەتاۋ. قازاقپارات - بۇگىن جاڭا جىل مەرەكەسىنە وراي كوكشەتاۋ قالاسىنان «استانا- كوكشەتاۋ» باعىتىنا شىعا بەرىستە جاڭادان سالىنعان ءزاۋلىم قاقپا اشىلدى.

نىساننىڭ اشىلۋ سالتاناتىنا ايماق باسشىسى سەرگەي كۋلاگين قاتىسىپ، قۇتتىقتاۋ ءسوز سويلەدى.

«وسىدان 17 جىل بۇرىن ءبىز ەسكى قاقپانى سالعان بولاتىنبىز. ودان بەرى قىرۋار جىل ءوتتى. سوندىقتان ءبىز ونى كۇننەن كۇنگە قۇلپىرىپ، گۇلدەنىپ جاتقان تاۋەلسىز ەلىمىز ءتارىزدى جاڭارتۋدى شەشتىك. بۇگىن سونىڭ ناتيجەسىن كورىپ وتىرمىز. بۇل قاقپا كوكشەتاۋ قالاسىنداعى ەڭ اسەم ساۋلەت نىسانى بولاتىنى ءسوزسىز. وسى ىسكە ورتاقتاسىپ، قاقپا قۇرىلىسىنا قول ءۇشىن سوزعان كاسىپكەرلەر مەن قۇرىلىسشىلارعا العىسىم شەكسىز»، دەدى وبلىس اكىمى.

اتالعان ساۋلەت قۇرىلىسى بيىكتىگى 15 مەتر، ۇزىندىعى 40 مەتر. ورتا تۇسىندا ۇلكەن ارىپپەن «كوكشەتاۋ» اتاۋى جازىلعان.

     

 اۆتور: اسلان وسپانوۆ