07:46, 25 - جەلتوقسان 2015 | GMT +5
ريم مەن ميلاندا اۆتوموبيلدەر قوزعالىسى شەكتەلەدى
استانا. قازاقپارات - ريم مەن ميلاننىڭ قالا بيلىكتەرى اۋانىڭ لاستانۋ دەڭگەيىنىڭ جوعارى بولۋىنا بايلانىستى اۆتوموبيلدەر قوزعالىسىن شەكتەيدى، دەپ حابارلادى BBC دىڭ ورىس قىزمەتى.
ساراپشىلاردىڭ ايتۋىنشا، ميلان مەن ريمدەگى جەلسىز اشىق كۇنى قالىڭ مۇنار باسىپ تۇرۋى اۋا لاستانۋى دەڭگەيىنىڭ ءتيىستى نورمادان ەلەۋلى اسىپ كەتۋىنە بايلانىستى.
دۇيسەنبى جانە سەيسەنبى كۇندەرى ريمنىڭ بارلىق كوشەلەرىندە التى ساعات بويى اۆتوموبيل قوزعالىسى جابىلادى. ميلاندا كەلەسى اپتادا ءۇش كۇن بويى اۆتوموبيلمەن قوزعالۋعا تىيىم سالىنادى.
ەكى قالادا دا بيلىك قوعامدىق كولىكتە ءجۇرۋ بيلەتتەرى باعاسىن شۇعىل ازايتۋعا پارمەن بەردى - ءسويتىپ، ادامدار اۆتوبۋستار مەن مەتروعا كوشەدى دەپ ءۇمىت ەتۋدە.
بۇدان بۇرىن دا يتالياندىق قالالاردىڭ وكىمەت ورىندارى تاق جانە جۇپ ءنومىرلى ماشينالاردى ءار كۇندەرى جۇرگىزىپ، اۆتوموبيل قوزعالىسىن شەكتەۋ ارقىلى اۋا لاستانۋىمەن كۇرەسۋگە تىرىسىپ باقتى. الايدا بۇل شارالار ءتيىستى ناتيجە بەرمەدى.
