ءدارى باعاسىن ۋداي قىمباتتاتقان كاسىپكەرگە قاتىستى داۋ

استانا. قازاقپارات - ا ق ش- تا «جەر بەتىندەگى ەڭ جەكسۇرىن ادامعا» قاتىستى تەرگەۋ ءىسى جالعاسۋدا.

مارتين شكرەليدى بۇقارالىق اقپارات قۇرالدارى وسىلاي دەپ اتاپ كەتكەن. ول - نيۋ-يوركتەگى ءدارى-دارمەك كومپانياسىنىڭ باسشىسى. مارتين سپيد پەن راك اۋرۋىنا شالدىققان ناۋقاستارعا قاتىستى ءدارى باعاسىن 55 ەسە كوتەرىپ جىبەرگەن. 32 جاستاعى مارتين شكرەلي - امەريكالىق ارماندى ىسكە اسىرۋعا بولاتىنىن ىسپەن دالەلدەگەن جىگىت. ول ءوزىن جەر بەتىندە ادام ايتقىسىز تابىسقا جەتكەن ەڭ اقجولتاي اداممىن دەپ ەسەپتەيدى. برۋكليننىڭ جۇمىسشىلار اۋدانىندا بالقاننان كەلگەن ميگرانتتار وتباسىندا ەر جەتكەن شكرەلي قور نارىعىنداعى وپەراتسيالاردىڭ ارقاسىندا كوتەرىلگەن. ال وسى جىلدىڭ تامىزىندا «داراپريمە» ءدارىسىن شىعارۋ پاتەنتىن 55 ميلليون دوللارعا ساتىپ العاننان كەيىن ونىڭ اتاعى دۇنيەجۇزىنە تارالدى. ءبىراق وسىدان كەيىن ۆ ي چ- كە شالدىققاندار مەن راك جۇقتىرعاندارعا اۋاداي قاجەتتى ءدارىنىڭ باعاسى 14 دوللاردان 750 گە دەيىن شارىقتاپ شىعا كەلدى. جاڭا باعا بويىنشا، ناۋقاس ءبىر ەمدەۋ كۋرسى ءۇشىن 300 مىڭنان 600 مىڭ دوللارعا دەيىن تولەۋى ءتيىس ەكەندىگى انىقتالعان سوڭ، بۇكىل امەريكا ورە تۇرەگەلدى. بىلاي العاندا مارتيننىڭ زاڭ بۇزعان تۇگى جوق. سەبەبى باعانى ساتىشۋلار قويادى جانە بۇل نارىقتى ەش جولمەن رەتتەلمەيدى. ءبىراق قوعام نارازىلىعىنا قاراماستان، بيزنەسمەن باعانى ارزانداتۋدان باس تارتتى.

مارتين شكرەلي، Turing Pharmaceuticals كومپانياسىنىڭ نەگىزىن قالاۋشى:

- مەن - جارىلقاۋشى ەمەسپىن، مەن - كاپيتاليستپىن. بۇل ءدارى كومپانياعا از تابىس اكەلدى. بار ماسەلە وسىندا.

حالىق شۋلاعان سوڭ، قۇقىق قورعاۋ ورگاندارى اتىشۋلى كاسىپكەردىڭ قۇقىقتىق قىزمەتىن تەكسەرۋگە كىرىستى. اقىرى ولار مارتين شكرەليدى قۇندى قاعازدار ارقىلى الاياقتىق جاسادى دەگەن ايىپپەن قاماۋعا الدى.

روبەرت كەيپەرس، نيۋ-يورك شىعىس وكرۋگىنىڭ پروكۋرورى:

- ول ءوزارا بايلانىستى 3 جۇيەنى ۇيىمداستىرعانى ءۇشىن 7 باپ بويىنشا ايىپتالادى. ەكەۋى ول نەگىزىن سالعان حەدج- فوندتارعا، ال ءۇشىنشىسى اتقارۋشى ديرەكتور رەتىندە باسقاراتىن اكسيونەرلىك قوعامعا قاتىستى. ايىپتاۋ قورىتىندىسىندا كورسەتىلگەندەي، شكرەلي قارجى پيراميداسىن جاساپ، الدىڭعى كومپانياعا قارجى سالعان ينۆەستورلارمەن ەسەپتەسۋ ءۇشىن اركەز باسقا كومپانيا قۇرىلىپ وتىرعان.

حالىق شكرەليدى «ادامگەرشىلىك پەن جاناشىرلىقتان جۇرداي» دەپ جەردەن الىپ، جەرگە سالۋدا. ەگەر بيزنەسمەننىڭ كىناسى دالەلدەنسە، ول 20 جىلعا دەيىن سوتتالۋى مۇمكىن. ازىرگە 5 ميلليون دوللاردى كەپىلگە قالدىرىپ، بوستاندىقتا ءجۇر.

www.24.kz