يليا يلين سپورتتان كەتەتىنىن ءمالىم ەتتى
بۇل تۋرالى سپورتشى دوكتورلىق ديسسەرتاتسياسىن قورعاۋعا ارنالعان باسپا ءسوز ءماسليحاتىندا ايتتى، دەپ حابارلايدى BNews.kz.
«كاسىپقوي سپورتشى جەڭىسكە جەتۋى ءۇشىن ۇنەمى جۇيەلى تۇردە جۇمىس ىستەپ وتىرۋى كەرەك. تىنىمسىز ەڭبەك ەتكەندە عانا جەتىستىكتەرگە جەتۋگە بولادى. مەن كۇنىنە ءۇش رەت جاتتىققان كەزدەرىم بولدى، ونىڭ ۇستىنە كوپ ساپارلايمىن. سونىڭ اراسىندا عىلىمي جەتەكشىممەن جولىعىپ، 2-3 ساعاتتاپ اكادەميادا سۇحباتتاسقان ۋاقىتتارىم بولدى. بۇل مەنىڭ باپكەرلىگىمنىڭ العاشقى قادامدارى عانا. شىنىمدى ايتسام، 32 جاسقا تولعاندا سپورتتان دا، باپكەرلىكتەن دە ءبىرجولا قول ۇزسەم دەيمىن. الداعى ۋاقىتتا ءوز كوماندامدا مەنەدجەر بولىپ قىزمەت ەتكىم كەلەدى»، - دەيدى ي. يلين.
27 جاستاعى سپورتشى ەكى دۇركىن وليمپيادا چەمپيونى، ءتورت دۇركىن الەم چەمپيونى. ەستەرىڭىزدە بولسا، بۇعان دەيىن ول ءبىر سۇحباتىندا ءۇشىنشى رەت وليمپيادا چەمپيونى اتانىپ، ءتورتىنشى وليمپيادا كەزەڭىنە قاتىسۋدى جوسپارلاپ وتىرعانىن مالىمدەگەن بولاتىن.
ايتا كەتۋ كەرەك، يلين جۋىردا عانا «جوعارى بىلىكتى اۋىر اتلەتتەردى دايىنداۋدىڭ عىلىمي- ادىستەمەلىك نەگىزدەمەسى» اتتى دوكتورلىق ديسەرتاتسياسىن قورعاعان بولاتىن.
