تالدىقورعاندا ازاننىڭ داۋىسىنان مازاسى قاشقان تۇرعىن مەشىتتى سوتقا بەردى

استانا. قازاقپارات - تالدىقورعاندا ەل ەستىمەگەن جاعداي ورىن الدى.

جەرگىلىكتى تۇرعىن مەشىتتىڭ ۇستىنەن تىنىشتىقتى بۇزدى دەپ پوليتسەيلەرگە شاعىم تۇسىرگەن. ودان ناتيجە شىقپاعاسىن قالانىڭ ىشكى ىستەر دەپارتامەنتى مەن باسقارماسىن دا «قول قۋسىرىپ وتىرعانى ءۇشىن» كىنالاعان.

تۇرعىننىڭ بۇل ارەكەتى تۋرالى سىبىس تۇرعىندار اراسىندا تەز تاراپ، جۇرتتى دۇرلىكتىرگەن.

«ەلدارحان شۇراتبايەۆتىڭ ءبىرىنشى ارىزى بويىنشا، «نۇر» مەشىتىنە جاقىن تۇراتىن تۇرعىندار اراسىندا ساۋالناما جۇرگىزىلدى. ولار ازان داۋىسىنا ەشقانداي شاعىمدارى جوق ەكەنىن ايتقان. سايكەسىنشە، ارىزدانۋشىنىڭ مەشىت اكىمشىلىگىن جاۋاپكەرشىلىككە تارتىپ، ايىپپۇل سالۋ تالابى قاناعاتتاندىرىلمادى. ودان كەيىن وبلىستىڭ ىشكى ىستەر دەپارتامەنتىنە مەنى «تۇنگى ۋاقىتتا تىنىشتىق بۇزعاندارعا (ازان شاقىراتىن «نۇر» مەشىتىنە) شارا قولدانباعانىم ءۇشىن» قىزمەتىمەن ءتۇسىرۋ تۋرالى ارىز بەرگەن.

دەپارتامەنت شۇرتابايەۆتىڭ ارىزىن قاناعاتتاندىرمادى. ودان كەيىن تۇرعىن ءدال سولاي ىشكى ىستەر ءمينيسترى قاسىموۆقا ارىزدانعان. ارىزىندا مەنىمەن قوسا، گەنەرال-مايور ءۇرىمحانوۆتى دا دۇرىس جاۋاپ قايتارماعانى ءۇشىن جازالاۋىن سۇراعان»، -  دەيدى تالدىقورعان ءى ءى ب باسشىسى ەرلان سانسىزبايەۆ.

تۇرعىنعا بۇل شاعىمى ورىنسىز ەكەنىن ءتۇسىندىرۋ ءۇشىن پوليتسەيلەر ءبىرشاما جۇمىستار اتقارعان. بارلىق سۇراقتارى قوعامدىق كەڭەستە ورتاعا سالىنىپ، وعان جاۋاپ بەرۋگە اتقارۋشى بيلىك وكىلدەرى، ب ا ق، ءتىپتى ءتۇرلى كونفەسسيالاردىڭ ءدىني قىزمەتكەرلەرى مەن اقساقالدار كەڭەسىنىڭ مۇشەلەرى جينالعان. الايدا ارىزدانۋشى ەكى رەت تە وتىرىسقا بارۋدان باس تارتىپ، كەڭەسكە قاتىسپاي قويعان.

بۇل جاعداي اقساقالداردىڭ قاتتى اشۋىنا تيگەن. ولار الدىمەن شۇراتبايەۆتى پسيحياترعا قاراتۋ كەرەك دەپ ساناسا، كەيىن اشۋلارى تارقاپ، تۇرعىندى شىدامدىراق بولۋعا شاقىرعان.

ولار ەر كىسىنىڭ اڭگىمەلەسۋگە شاقىرتۋدى الاتىنىنا ءالى دە ءۇمىتتى.

بۇل تۋرالى express-k.kz-كە سىلتەمە جاساپ NUR. KZ حابارلايدى.