قازاقستان سەناتورلارى ەلدىڭ سىرتقى قارىزىنا الاڭداۋشىلىق ءبىلدىردى
«مەن بۇل زاڭ جوباسىن تولىقتاي قولدايمىن. دەگەنمەن مەنىڭ وسىعان بايلانىستى ساۋالىم بار. قارىز العان كەزدە باسقا ادامنىڭ اقشاسىن الاسىڭ، ال قايتارعاندا ءوز اقشاڭدى بەرەسىڭ. وسى جونىندە مينيسترگە سۇراق قويعىم كەلەدى. مەملەكەتتىڭ قازىرگى قارىزىنىڭ كولەمى قانداي؟ ەكىنشىدەن، بيۋدجەت ساياساتىن قاراستىرساق، مەملەكەتتىڭ جاعدايى قانداي بولادى؟»، - دەپ سۇراق قويدى دەپۋتات.
وسى ورايدا مينيستر باقىت سۇلتانوۆ مەملەكەتتىڭ قارىزى باسقا ەلدەرمەن سالىستىرعاندا از ەكەنىن مالىمدەدى.
«بىلتىرعى بيۋدجەت ساياساتىن قاراساق، ءبىزدىڭ قارىز باسقا ەلدەرمەن سالىستىرعاندا كوپ ەمەس. جالپى ىشكى ونىممەن سالىستىرعاندا ەلدىڭ سىرتقى قارىزى 15-17 پايىزدى قۇرايدى. بۇل وتە تومەن كورسەتكىش»، - دەدى سۇلتانوۆ.
سونىمەن قاتار، ول سىرتقى قارىزدىڭ بيۋدجەتكە اۋىرتپالىق تۇسىرمەيتىنىن ايتتى. «سوندىقتان دا بىزدە قارىز الۋعا ءالى دە مۇمكىندىك بار»، - دەدى مينيستر.
«كەلەر جىلعى بيۋدجەت تاپشىلىعىن ءبىز 1,6 پايىزعا بەكىتتىك. ونى 1 پايىزعا دەيىن تومەندەتۋدى جوسپارلاپ وتىرمىز»، - دەدى سۇلتانوۆ.
ايتا كەتەيىك، «قازاقستان رەسپۋبليكاسى مەن ازيا دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» ق ر زاڭ جوباسىن سەنات دەپۋتاتتارى قابىلدادى.
قارىز 2016-جىلدىڭ بيۋدجەت تاپشىلىعىن قارجىلاندىرۋعا باعىتتالادى. بۇل تۋرالى كەشە قارجى ءمينيسترى باقىت سۇلتانوۆ مالىمدەدى.
