گ. ءابدىقالىقوۆا: ي. يلين - ناعىز پاتريوت

استانا. قازاقپارات - قازاقستاننىڭ مەملەكەتتىك حاتشىسى گۇلشارا ءابدىقالىقوۆا استانادا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە وتكىزگەن دارىسىندە ناعىز پاتريوتتىق تۋرالى ءوز ويىن ايتتى.

«كوبىمىز پاتريوتتىقتى ۇندەۋ دەپ ەسەپتەيمىز، الايدا قازاقستاندىقتاردىڭ ۇلتجاندىلىعى بار. بىرنەشە مىسال كەلتىرگىم كەلەدى. جاقىندا، سىزدەر بىلەسىزدەر، يليا يلين گروزنىيدا اۋىر اتلەتيكادان وتكەن حالىقارالىق جارىستا باس جۇلدە جەڭىپ الدى. ال ماراپاتتاۋ راسىمىندە ءبىر ولقىلىق ورىن الدى. ۇيىمداستىرۋشىلار ءبىزدىڭ ەلىمىزدىڭ ەسكى ءانۇرانىن قويدى. يليا - ناعىز پاتريوت. ول ءبىزدىڭ جاڭا ءانۇرانىمىزدىڭ قويىلعانىن تالاپ ەتتى»، - دەدى گ. ءابدىقالىقوۆا.

سونىمەن قاتار، مەملەكەتتىك حاتشى ورال قالاسىندا ەكى قىزدى سۋدان قۇتقارىپ قالعان 13 جاستاعى بالانى مىسالعا كەلتىردى.

«ول سۋ تۇبىندە جاتقان قىزدى قۇتقارۋ ءۇشىن سۋعا بىرنەشە رەت سۇڭگىگەن. بۇل دا ۇلتجاندىلىقتىڭ بەلگىسى»، - دەپ ەسەپتەيدى ول.

گ. ءابدىحالىقوۆا 2011-جىلى تاراز قالاسىندا ەكى ادامدى ءولتىرىپ ۇلگەرگەن اسا قاۋىپتى ەكسترەميستتى ۇستاپ، ءوزىنىڭ ءومىرىن پيدا ەتكەن پوليتسيا كاپيتانى عازيز بايتاسوۆتىڭ ەرلىگىن دە تىلگە تيەك ەتتى.

«پوليتسيا كاپيتانى، مارقۇم عازيز بايتاسوۆقا 2011-جىلى «حالىق قاھارمانى» اتاعى بەرىلدى. ول بىرنەشە ادامدى ولتىرگەن اسا قاۋىپتى قىلمىسكەردى ۇستادى. ول دا - پاتريوتيزم. پاتريوتيزم ءارقايسىمىزدىڭ بويىمىزدا بار. ءبىز ەڭبەك ەتۋ ارقىلى، ءوز وتانىمىزدىڭ دامۋىنا ۇلەستەرىمىزدى قوسىپ كەلەمىز. قوعامدىق ومىرگە بەلسەندى ارالاسامىز. مەنىڭشە، وسىنىڭ بارلىعى - پاتريوتيزم»، - دەپ ءسوزىن تۇيىندەدى مەملەكەتتىك حاتشى.

اۆتور: جاسۇلان جولدىبايەۆ