داۋىرلىك وزگەرىستەردى قالىپتاستىرۋعا وزگە مەملەكەتتەرگە ونداعان جىل قاجەت بولسا، ءبىز وعان تاۋەلسىزدىك جىلدارى قول جەتكىزدىك - گ. ءابدىقالىقوۆا

استانا. قازاقپارات - كوپتەگەن ساراپشىلار ءبىزدىڭ كەزەڭ «نازاربايەۆ ءداۋىرى» دەپ اتالاتىنىنا كامىل سەنىمدى.

بۇگىن استانادا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە ءدارىس وتكىزگەن ق ر مەملەكەتتىك حاتشىسى گۇلشارا ءابدىقالىقوۆا وسىلاي اتاپ كورسەتتى.

«كوپتەگەن ساراپشىلار ءبىزدىڭ كەزەڭ «نازاربايەۆ ءداۋىرى» دەپ اتالاتىنىنا كامىل سەنىمدى. شىن مانىندە، وزگە مەملەكەتتەرگە ونداعان جىلدار قاجەت ەتىلسە، ءبىزدىڭ تاۋەلسىزدىك جىلدارى ءوز بويىنا داۋىرلىك وزگەرىستەردىڭ اسا قۋاتتى قاباتىن قالىپتاستىردى»، - دەپ اتاپ ءوتتى مەملەكەتتىك حاتشى.

ونىڭ ءسوزى بويىنشا، ەۋرازيانىڭ ورتاسىندا ورنالاسقان قازاقستان مەملەكەتى مەيلىنشە قولايسىز گەوساياسي، ەكونوميكالىق جانە الەۋمەتتىك باستاۋلار جاعدايىنىڭ وزىندە دامۋدىڭ ساتىلى سەرپىلىسىن جاساۋعا مۇمكىن ەكەندىگىن ايقىن كورسەتتى.

«سىزدەر بىلەسىزدەر، يندۋستريالدى دامىعان ەلگە اينالۋ ءۇشىن ۇلى بريتانياعا 50 جىل قاجەت بولدى، ا ق ش- قا 50  جىلدان استام، وڭتۇستىك كورەياعا 10  جىل مەرزىم كەتتى. سينگاپۋر، تايلاند، مالايزيا، يندونەزيا سىندى مەملەكەتتەر دە قىسقا ۋاقىتتا جەتىستىككە جەتە الدى. مەنىڭشە، قازاقستان دا سول ەلدەردىڭ قاتارىنا كوپ ۇزاماي ەنەتىن بولادى. تاۋەلسىز قازاقستاننىڭ تاريحى، قازىرگى زامانعى مەملەكەتتىڭ دامۋ تيىمدىلىگى حاريزماتيكالىق، پاسسيونارلىق جانە جالپى ۇلتتىق كوشباسشىسىنىڭ بولۋىمەن ايقاندالاتىنى ءسوزسىز دالەلدەندى. قازاقستان ءۇشىن مۇنداي تۇلعا، ءسوزسىز ساياسي ەرىك-جىگەردىڭ ارقاسىندا قازاقستان حالقىن توپتاستىرعان، سول ارقىلى قازاقستاننىڭ الەۋمەتتىك-ەكونوميكالىق جانە قوعامدىق-ساياسي تۇرعىدا تۇبەگەيلى وزگەرىستەردى بەرىك نەگىزىنە اينالدىرعان - نۇرسۇلتان ءابىش ۇلى نازاربايەۆ»، - دەدى گ. ءابدىقالىقوۆا.

ايتا كەتەيىك، ق ر مەملەكەتتىك حاتشىسى ستۋدەنتتەر الدىندا وقىعان دارىسىندە قازاقستان حالقى اسسامبلەياسىنىڭ ىشكى تۇراقتىلىق پەن ۇلتارالىق كەلىسىمگە قوسىپ جاتقان ۇلەسى مەن ءرولى، ن. نازاربايەۆتىڭ باستى ۇلتتىق جوبالارى جانە حالىقارالىق باستامالارى تۋرالى تاقىرىپتاردى كوتەرگەن بولاتىن.

اۆتور: جاسۇلان جولدىبايەۆ