استانالىق توعىز جاسار دانيار كۇردەلى ەسەپتەردى ويشا شىعارىپ، «پۋست گوۆوريات» تەلەشوۋى قوناقتارىن تاڭعالدىردى

 استانا. قازاقپارات - استانا قالاسىنداعى مەكتەپتە 4-سىنىپتا وقيتىن دانيار قۇرمانبايەۆ رەسەيلىك «ءبىرىنشى ارنانىڭ» «پۋست گوۆوريات» تەلەشوۋىنىڭ 23 - جەلتوقسانداعى حابارىنا قاتىسىپ، كۇردەلى ەسەپتەردى شەمەشكىشە شاعىپ، باعدارلاماعا قاتىسۋشىلاردى تاڭعالدىردى.

 دانياردىڭ تالانتىن تەكسەرىپ كورمەكشى بولعان جۇرگىزۋشى اندرەي مالاحوۆ تا، كالكۋلياتورمەن ەسەپتەپ شىعارۋعا تىرىسىپ، ونىڭ تالانتىن انىقتاۋعا تىرىسقان حابار قوناقتارى دا استانالىق وقۋشىنىڭ ەسەپكە جۇيرىكتىگىنە ىلەسە الماي، تاڭدانىسىن جاسىرا المادى.

«مەنتالدى اريفمەتيكا ماعان كوپ كومەكتەسەدى: مۇقيات بولۋدى، تەز ويشا ەسەپتەۋدى ۇيرەندىم. بۇعان دەيىن تەك باعاندارمەن كوبەيتىپ، بولەتىنمىن، ال ەندى ونى ويشا ەسەپتەۋ دە قولىمنان كەلەدى. ءۇزىلىس كەزىندە بالالار ماعان جاقىنداپ مۇنى قالاي جاسايتىنىمدى سۇراپ جاتادى» - دەيدى وقۋشى.

جۇرگىزۋشىلەردىڭ الدىنا شىققان دانيار ءوزىنىڭ ەرەكشە بالا ەكەنىن قىمسىنباستان مويىندايدى. اريفمەتيكا ساباقتارىنا ونى اناسى الىپ بارعان، دەپ جازادى دانيار تۋرالى www.nur.kz.