باتىس قازاقستاندا ۇزاق كۇيشىنىڭ كەسەنەسى اشىلدى - فوتو
ونىڭ اشىلۋ راسىمىندە اۋدان اكىمى اسحات شاحاروۆ، وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆ، ۇزاق كۇيشىنىڭ ۇرپاعى نۇربولات قازبايەۆ، «ۇزاق كۇيشى» قوعامدىق قورىنىڭ ديرەكتورى مۇرات ءالجانوۆ ءسوز سويلەپ، بۇل بابا ەسىمىن ماڭگى ەستە قالدىرۋ باعىتىندا اتقارىلعان يگى ءىستىڭ ءبىرى ەكەندىگىن اتاپ ءوتتى.
بۇدان كەيىن قورجىن اۋىلدىق مادەنيەت ۇيىندە «ۇلى دالانىڭ تاريحى - ۇلى حالىقتىڭ تاريحى» اتتى عىلىمي-تاجىريبەلىك كونفەرەنسيا ءوتىپ، وندا عالىمدار، م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى «قازاقستان تاريحى جانە ولكەتانۋ» عىلىمي ورتالىعىنىڭ جەتەكشىسى، تاريح عىلىمدارىنىڭ كانديداتى جاڭابەك جاقسىعاليەۆ، باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى مۇرات سابىر بايانداما جاسادى.
- بۇگىن ءبىر توبەنىڭ سىرى اشىلدى. ءبىر توبەنىڭ مارتەبەسى بيىكتەدى. ءبىر وشكەن شام جاعىلدى. اقت ۇلىمنىڭ الابى ارۋاقتاندى. تاريحقا تاعزىم، وتكەنگە قۇرمەت دەگەن وسى. توبەگە قاراپ تاريحىن تۇگەندەيتىن قاراتوبە ءوڭىرىنىڭ مارتەبەسى اركەز اسقاقتاي بەرسىن، - دەدى بەلگىلى ايتىسكەر اقىن، قازاقستاننىڭ ەڭبەك سىڭىرگەن مادەنيەت قىزمەتكەرى شولپان قىدىرنيازوۆا.
ايتا كەتەيىك، توكپە كۇيلەردىڭ نەگىزىن قالاۋشىلاردىڭ ءبىرى ۇزاق مىرزاباي ۇلى ХVІІІ عاسىردىڭ سوڭى مەن ⅩⅨعاسىردىڭ ورتاسىندا ءومىر سۇرگەن. ونىڭ بۇگىنگى كۇنگە «ۇزاق اقجەلەڭ» اتتى كۇيى جەتكەن. ۇزاق كۇيشى قۇرمانعازىنى ەل ارالاعاندا، قاسىنا ەرتىپ ءجۇرىپ، باۋلىعان، ءوزىنىڭ باتاسىن بەرگەن.
