دەنساۋلىق: اعزاداعى ارتىق سۋدى شىعارۋدىڭ جولى قانداي؟

استانا. قازاقپارات - اعزادا سۋدىڭ شامادان تىس كوپ بولۋى ىسىنۋگە، كوز استىنىڭ دوربالانىپ، سالماقتىڭ ارتۋىنا اكەلەدى. اياق تا ءىسىنىپ، اياق كيىم تار بولىپ سەزىلەدى. قولدىڭ ساۋساقتارى دا ىسىنەدى.

 مۇنىڭ ءبارى ادامنىڭ تىنىشىن كەتىرىپ، مازاسىن الادى. اعزاداعى ارتىق سۋدان قالاي ارىلۋعا بولادى؟

ارتىق سۋ قايدان پايدا بولدى؟

اعزاداعى سۋدىڭ مولشەردەن تىس بولۋى دەنساۋلىقتا كىناراتتىڭ بارىن بىلدىرەدى. مۇمكىن، بۇيرەك ءوز جۇمىسىن جاقسى اتقارمايتىن شىعار. نەمەسە، جۇرەگىڭىز سىر بەرە باستاعان. ارينە، دارىگەرگە قارالۋ كەرەك. ءبىراق، كوپ جاعدايدا دۇرىس تاماقتانۋدى جولعا قويىپ، تۇزدى شامادان تىس جەۋدەن تارتىنعانىڭىز كەرەك.

سۋ جينالۋىنىڭ سەبەپتەرى:

1. سۋدىڭ جەتىسپەۋشىلىگى. كۇنىنە 2 ليتردەن كەم ەمەس سۋ ءىشۋ كەرەكتىگىن ءبارى دە بىلەدى. الايدا، مۇنى ورىندايتىندار از. تاۋلىك نورماسىن ورىنداۋ ءۇشىن، مي اعزاعا سۋدى جيناۋ تۋرالى سيگنال بەرەدى. قاسىڭىزعا ءبىر قۇتى تازا سۋدى قويىپ، كۇنى بويى سونى ءىشىپ جۇرۋگە تىرىسىڭىز. از ازدان، ءبىراق جيىرەك ءىشىڭىز. ەكى اپتادان سوڭ اعزا ۇيرەنىسەدى دە، ارتىق سۋدى جيناۋدى توقتاتادى.

2. نەسەپ ايداعىش شىرىندار. الكوگولدىڭ (ونىڭ ىشىندە سىرا) نەسەپ ايداعىش اسەرى وتە مول. سونىمەن قاتار، شاي، كوفە جانە گازدالعان سۋسىندار دا وسىنداي قاسيەتكە يە. كوپ جاعدايدا اتالعان سۋسىندار اعزانى قۇرعاتىپ جىبەرەدى. زەرتتەۋ كورسەتكەندەي، اعزا ارتىق سۋدى ىسىك سەكىلدى ساقتايدى. سوندىقتان، كوپ جاعدايدا تازا سۋ ىشۋگە تىرىسىڭىز.

3. تۇزدىڭ ارتىق مولشەرى. تۇزدىڭ ءبىر مولەكۋلاسى سۋدىڭ 20 مولەكۋلاسىن بايلانىستىرادى دا، ماي جاسۋشالارىندا كورىنبەي قالادى. سودان سوڭ، ولار ۇلكەيەدى دە، ارتىق سالماق جينالا باستايدى. سونىمەن قاتار، زياندى تۇزدى شىعارۋ ءۇشىن اعزاعا قوسىمشا سۋ قاجەت بولادى. جول بىتەلەدى دە، ىسىك تارقامايدى. سول سەبەپتى، تۇزدى تاعامدار، اسىرەسە، چيپستەر، تۇزدى بالىق، سىراعا ارنالعان جاڭعاقتاردى مەيىلىنشە ازىراق پايدالانىڭىز.

4. تۇنگە قاراي سۋ ءىشۋ. ساعات كەشكى 20.00-دەن سوڭ ىشكەن سۋ بۇيرەككە سالماق تۇسىرەدى دە، تاڭەرتەڭ بەتىڭىز ءىسىپ كەتەدى. سۋدىڭ كوپ بولىگىن كەشكى ساعات 6-7-گە دەيىن ىشۋگە تىرىسىڭىز. ءوزىڭىزدىڭ تاماقتانۋ سالتىڭىزعا ءمان بەرىڭىز. مۇمكىن، ءوز قاتەلىكتەرىڭىزدى بايقاماي جۇرگەن شىعارسىز. ايتپاقشى، سۋدى اعزادان تەز شىعارۋعا ارنالعان ءداستۇرلى ادىستەر دە بار.

اعزادان سۋدى شىعاراتىن تاعامدار:

1. جاز كەزىندە قاربىز جەگەن پايدالى. ول تەك سۋدى شىعارىپ قويماي، بۇيرەكتى تازارتىپ، قىزمەتىن جاقسارتادى. اعزاداعى سۋدى شىعارۋعا قاۋىن مەن قيار دا كومەكتەسەدى. اپتاسىنا ءبىر رەت كۇنىڭىزدى تەك قاربىز نەمەسە قيار جەۋگە ارناڭىز. ناتيجەسىن العاشقى كۇنى- اق كورەسىز.

2. كوكتەم كەزىندە قايىڭ شىرىنىن ىشكەن دۇرىس. ول ۇلپاداعى شلاكتار مەن تۇزدى شىعارادى. بۇل وتە پايدالى شىرىن جانە ونى كۇنىنە ءۇش ستاكاننان ىشكەن ءجون.

3. كوك شاي مەن كاركادە دە جەڭىل نەسەپ ايداعىش سۋسىندار رەتىندە تانىمال. قارا شايعا قاراعاندا، كوك شايدى كوبىرەك ىشۋگە دە بولادى.

4. كۇرىش جانە سۇلى بوتقاسى دا سۋدى جاقسى شىعارادى. كۇرىشتە ناتري كولەمى از (ال ناتريدە سۋ كوپ) جانە تۇزدى شىعاراتىن كاليي كوپ. كاسىبي سپورتشىلار ماڭىزدى جارىس الدىندا ارنايى ديەتا قولدانىپ، بىرنەشە كۇن بويى تۇزسىز كۇرىش بوتقاسىن عانا جەيدى.

5. بالعىن جەمىس- جيدەك پەن كوكونىستەردە تۇز جوق. سوندىقتان، جەمىس- جيدەكتى كوپ جەسەڭىز، تۇزدىڭ تەپە تەڭدىگى ساقتالادى. قىزىلشا مەن ورامجاپىراق ىسىنۋگە قارسى قۇرالداردىڭ ءبىرى.

6. اعزاداعى تۇزدى شىعاراتىن، قۇرامىندا كالي كوپ تاعامداردى كوپ پايدالانىڭىز: اسقاباق، ورامجاپىراق، كادى، الما، ورىك جانە كەپتىرىلگەن جەمىستەر.

اعزاداعى ارتىق سۋدى قالاي شىعارۋ كەرەك

اعزاداعى سۋدى شىعارۋعا ساۋنا نەمەسە مونشا كومەكتەسەدى. ارتىق سۋ سول كەزدە شىعادى. ساۋناعا ءجيى بارىپ تۇرۋ ارىقتاۋعا دا كومەكتەسەدى.

دەنە جاتتىعۋلارى مەتابوليزمدى تەزدەتىپ، دەنەدەگى سۇيىقتىقتى تەر ارقىلى شىعارۋعا كومەكتەسەدى. اياقتىڭ ىسىنۋىنە جاياۋ اياڭ ءجۇرىس، جۇگىرۋ، اەروبيكالىق جاتتىعۋلار، ۆەلوسيپەد تەبۋ دە جول بەرمەيدى.

كۇنىنە 1-2 ساعات اياقتى جۇرەك تۇسىنان جوعارى كوتەرىپ قويۋدىڭ دا كومەگى كوپ. مىسالى، ديۆاندا جاتقاندا اياق استىنا جاستىقتى قويىپ قويىڭىز. سول كەزدە تابانداعى ىسىك تەز قايتادى. بۇل كۇنى بويى وتىرىپ جۇمىس ىستەيتىن ادامدار ءۇشىن وتە پايدالى.

ەگەر جاعداي وتە قيىن بولىپ، اعزاداعى سۋدى دەرەۋ شىعارۋ قاجە بولسا، نەسەپ ايدايتىن پرەپاراتتار - «فۋروسەميد»، «توراسەميد»، «ديۋۆەر»، «ەتاكرينوۆايا كيسلوتا»، «ديۋرسان» جانە باسقالارىن قابىلداڭىز.

الايدا، بۇل دارىلەردى دە شامادان تىس قابىلداماڭىز. اعزادان سۋدى شىعاراتىن تابلەتكالار ۇلپاداعى كالتسي، كالي جانە ماگنيدى وزىمەن بىرگە الىپ كەتەدى. سوندىقتان، اتالعان پرەپاراتتاردى تەك دارىگەردىڭ رۇقساتىمەن قابىلداڭىز. الايدا، ەڭ دۇرىسى تابيعي نەسەپ ايداعىشتاردى قابىلداعان. ونىڭ ىشىندە ءشوپتىڭ الاتىن ۇلەسى زور. ءشوپ جيىنتىقتارى جۇمساق ءارى اعزاعا قاۋىپ توندىرمەيدى.

اعزادان سۋدى شىعارۋعا ارنالعان شوپتەر مەن تۇنبالار:

1. قايىڭ جاپىراقتارىنان دايىندالعان تۇنبا. ۇساقتالىپ، كەپتىرىلگەن جاپىراقتار كەز كەلگەن ءدارىحانادا ساتىلادى. 2 اس قاسىق قۇرعاق جاپىراقتى ىستىق سۋعا سالىپ، 30 مينۋت بۇقتىرىڭىز. تۇنباعا پىشاقتىڭ ۇشىمەن عانا اس سوداسىن قوسىڭىز. كۇنىنە ءۇش رەت 1 شاي قاسىقپەن ءىشىپ تۇرىڭىز.

2. يتمۇرىن نەمەسە بۇلدىرگەننەن دايىندالعان شاي: قۇرعاق جيدەكتەردى ادەتتەگى شاي سەكىلدى شىعارىڭىز دا، كۇنىنە جارتى كەسەدەن 2-3 رەت ءىشىڭىز.

3. اسكوكتىڭ تامىرى دا مىقتى نەسەپ ايداعىش بولىپ ەسەپتەلەدى. 1 اس قاسىق تۇنبانى ىستىق سۋعا قوسىڭىز دا، جارتى ساعاتقا قالدىرىڭىز. كۇنىنە ءۇش رەتتەن 1 اس قاسىقپەن ءىشىڭىز.

4. المانىڭ قۇرعاتىلعان قابىعىنان كومپوت قايناتىپ، كۇنىنە 5 رەت جارتى كەسەدەن ءىشىپ تۇرۋعا بولادى.

 ەگەر ءسىز جوعارىدا ايتىلعان ادىستەردىڭ ءبىرىن قولدانىپ، ولاردىڭ پايداسىن كورمەسەڭىز، كوڭىلىڭىزگە كىربىڭ تۇسپەسىن. ءبىر زاتتىڭ بارلىق ادامعا بىردەي اسەر بەرمەيتىنىن دە ۇمىتپاعان ابزال. ءارتۇرلى ادىستەردى قولدانىپ، وزىڭىزگە لايىقتىسىن تابىڭىز. مۇمكىن، قايىڭ تۇنباسى مەن يتمۇرىننان جاسالعان قوسپا ءسىز ءۇشىن وتە پايدالى بولاتىن شىعار.

 كەرەك كەڭەس confederation.kz سايتىنان الىندى.