تالدىقورعان قالاسىندا «اق داستارحان» بايقاۋى ءوتتى - فوتو

استانا. قازاقپارات - تالدىقورعان قالاسىندا جىل سايىنعى ءداستۇرلى «اق داستارحان» اسپازدار بايقاۋى ءوتتى.

بايقاۋعا اۋداندىق، قالالىق ىرىكتەۋ تۋرلارىندا جەڭىمپاز بولعان 23 اسپاز قاتىستى، دەپ حابارلايدى الماتى وبلىسى اكىمىنىڭ باسپا ءسوز قىزمەتىنەن.

بايقاۋ بارىسىندا 500 دەن استام ءتۇرلى تاعامدار مەن كونديتەرلىك بۇيىمدار قازىلاردىڭ ساراپتاۋىنا ۇسىنىلدى. باعالاۋ بارىسىندا تاعامنىڭ ساپاسىمەن قاتار ونى ۇسىنۋ جانە بەزەندىرۋ ەرەكشەلىگىنە، دەنساۋلىققا پايدالى تاعامدارعا باسىمدىق بەرۋ جايىنا دا نازار اۋدارىلدى.

قازىلار القاسىنىڭ ءتوراعاسى، قازاقستانداعى اسپازدىق ءىسى بويىنشا حالىقارالىق ساراپشى سەرىكحان ءادىلحانوۆتىڭ ايتۋىنشا، «اق داستارحان» - تەك اسپازدىق بايقاۋى عانا ەمەس، مەيرامحانالىق ءىستىڭ ساپاسى مەن بىلىكتىلىگىن ارتتىرۋ الاڭى دا. ونىڭ تۇپكى نەگىزىندە «سالاماتتى تاماقتانۋ» ۇستانىمى جاتىر.

بىرنەشە نوميناتسيا بويىنشا وتكەن كونكۋرستىڭ جالپى قورىتىندىسىندا «قوعامدىق تاماقتانۋ سالاسىنىڭ جىل ۇزدىگى» اتاعى جانە گران-پري جۇلدەسى قاراساي اۋدانىنىڭ قاسكەلەڭ قالاسىنان كەلگەن «Rhama Park» مەيرامحاناسىنىڭ ۇجىمىنا بەرىلدى.

 قازىلار القاسى قاتىسۋشىلار اراسىنان «جىلدىڭ ۇزدىك اسپازى» نوميناتسياسى بويىنشا تالدىقورعان قالاسىنداعى «كيشلاك» مەيرامحاناسىن، «جىلدىڭ ۇزدىك كونديتەرى» اتالىمىندا قاسكەلەڭ قالاسىنداعى «اس-مار» كونديتەرلىك كەشەنىن، «جىلدىڭ ۇزدىك داياشىسى» اتالىمىندا قاراساي اۋدانىنداعى «Rhama Park» مەيرامحاناسىنىڭ كونديتەرى تاتيانا بوبروۆسكايانى جەڭىمپاز دەپ تانىدى.

سونىمەن قاتار وسى بايقاۋدا تالدىقورعان قالاسىنىڭ «سەرەبرياننىي ۆودوپاد» كونديتەرلىك سەحى، ۇشتوبە قالاسىنداعى «لاد» كونديتەرلىك كەشەنى، ەڭبەكشى قازاق، تالعار اۋداندارىنىڭ اسپازدىق-كونديتەرلىك سەحتارى، جامبىل، الاكول اۋدانىنىڭ اسپازدارى جۇلدەگەرلەر قاتارىنان كورىندى. ولار اقشالاي جانە ەستەلىك سىيلىقتارمەن، ديپلومدارمەن ماراپاتتالدى.