ب. ساعىنتايەۆ قازاقستان ەكونوميكاسىنىڭ باستى جۇرگىزۋشى كۇشىن اتادى
«شىندىعىندا دا وسى جىلدىڭ باسىنان قازاقستان الەمدىك ەكونوميكا ءوسىمىنىڭ باياۋلاۋى جاعدايىندا دامۋدا. بۇعان دەيىن اتاپ وتكەنىمدەي، قازاقستاننىڭ نەگىزگى ەكسپورتتىق تاۋارلارىنىڭ باعاسى دا، سۇرانىس تا تومەندەۋدە. «نۇرلى جول» ينفراقۇرىلىمدىق دامۋ مەملەكەتتىك باعدارلاماسى اياسىنداعى شارالار مەن 2015-2016 -جىلدارعا ارنالعان ۇكىمەتتىڭ جەدەل شارالار جوسپارىنىڭ قابىلدانۋىنىڭ ارقاسىندا ءبىز «مينۋسقا» كەتپەدىك، 10 ايداعى قازاقستان ەكونوميكاسىنىڭ ءوسىمى 1 پايىزدى قۇرادى»، - دەدى ب. ساعىنتايەۆ.
ۆيتسە-پرەمەردىڭ العا تارتقان دەرەكتەرىنە سايكەس، قازاقستاندا مەملەكەتتىك باعدارلامالاردىڭ اياسىنداعى ينفراقۇرىلىمدىق جوبالاردى جۇزەگە اسىرۋدىڭ ناتيجەسىندە نەگىزگى كاپيتالعا سالىنعان ينۆەستيتسيا كولەمى 3,8 پايىزعا ءوستى. ال تاۋ-كەن سەكتورىنداعى ءوندىرىس كولەمىنىڭ قۇلدىراۋىنا بايلانىستى ونەركاسىپ ءوندىرىسى 1,3 پايىزعا كەمىسە، وڭدەۋ ونەركاسىبىندەگى ءوسىم قارقىنى 0,5 پايىزدى قۇراعان. مۇنان بولەك، اۋىل شارۋاشىلىعىندا، قۇرىلىستا، ساۋدادا، كولىك پەن بايلانىستا تا ءوسىم بايقالادى.
«گاز سالاسىندا وڭ ديناميكانى اتاپ وتكىم كەلەدى. 2015 -جىلدىڭ 10 ايىندا گاز ءوندىرۋ كولەمى وتكەن جىلدىڭ سايكەس كەزەڭىمەن سالىستىرعاندا 5 پايىزعا ارتىپ، 37 ميلليارد تەكشە مەترى قۇرادى. بۇعان قوسا، جىل سوڭىندا دەيىن جوسپارلانعان گاز ءوندىرۋ كولەمى 43,8 ميلليارد تەكشە مەترگە تەڭ. گاز ەكسپورتىندا دا ءوسىم بايقالادى. وتكەن جىلدىڭ سايكەس كەزەڭىمەن سالىستىرعاندا 14 پايىزعا ءوسىپ، 10 ميلليارد تەكشە مەترگە جەتتى»، - دەدى ول.
اۆتور: مارلان جيەمباي
