ەرلان ىدىرىسوۆ: رەسەي مەن تۇركيا اراسىنداعى شيەلەنىسكە وكىنەمىز

استانا. قازاقپارات - قازاقستان سىرتقى ىستەر ءمينيسترى ەرلان ىدىرىسوۆ تۇركيادان قازاقستانعا كەلەتىن جۇك كولىكتەرىنىڭ شەكارادان وتە الماي، اقتاۋ پورتىندا ءۇيىلىپ قالعانىنا قاتىستى تۇسىنىك بەردى. ونىڭ سوزىنشە، رەسەي مەن تۇركيا اراسىنداعى قارىم- قاتىناستىڭ ناشارلاۋى قازاقستاندى «وكىنتەدى».

استانادا وتكەن بريفينگتە ىدىرىسوۆقا ازاتتىق ءتىلشىسى رەسەي ءوز تەرريتورياسىنان وتكىزبەي قويعان قازاقستانعا كەلەتىن تۇركيالىق جۇك كولىكتەرىنىڭ رەسەي مەن گرۋزيا شەكاراسىندا جينالىپ قالعانىن، ولاردى وتكىزۋ ماسەلەسى قالاي شەشىلىپ جاتقانىن سۇراعان.

ىدىرىسوۆ قازاقستان پرەزيدەنتى نۇرسۇلتان نازاربايەۆ رەسەي مەن تۇركيا اراسىنداعى جانجالعا قاتىستى ەكى ەل باسشىلارىمەن سويلەسكەنىن، قازاقستان جاعى رەسەي بيلىگىمەن ترانزيت ماسەلەسىن رەتتەۋ تۋرالى كەلىسسوز جۇرگىزگەنىن ايتتى.

- بۇدان ەڭ الدىمەن ءبىزدىڭ بيزنەسمەندەر، تاسىمالداۋشىلارىمىز زارداپ شەكتى. سەبەبى مارشرۋتتىڭ وزگەرۋى مەن ۇزارۋى تاۋاردى تاسىمالداۋ قۇنىنا، ەڭ سوڭى تۇتىنۋشىلارعا دا اسەر ەتتى. بىزدە ەۋرازيا ەكونوميكالىق وداعى اياسىندا شەكارا جوق بولعاندىقتان مۇنداي جاعداي بولماۋى ءتيىس. رەسەي مەن تۇركيا اراسىنداعى، جالپى العاندا رەسەيدىڭ باتىس ەلدەرىمەن اراسىنداعى سانكسيا سالۋ ساياساتى ساۋدا- ساتتىقتىڭ دۇرىس جۇرۋىنە كەدەرگى كەلتىرىپ وتىر. بۇل ماسەلەمەن قازىر ۆيتسە- پرەمەر باقىتجان ساعىنتايەۆ كۇندەلىكتى، تۇراقتى تۇردە اينالىسىپ جاتىر. مۇنداي جاعداي الدا بولمايدى دەپ ۇمىتتەنەمىز» دەدى ىدىرىسوۆ.

رەسەي مەن تۇركيانىڭ قارىم- قاتىناسى تۇركيا اسكەري- اۋە كۇشتەرىنىڭ 24 - قاراشادا سيريامەن شەكارادا رەسەيلىك سۋ-24 بومبالاۋشى ۇشاعىن اتىپ تۇسىرۋىنەن كەيىن ناشارلاعان.

«ازاتتىق»