قازاقستان ءبىر ميلليارد دوللار قارىز الاتىن بولدى
بۇگىن پارلامەنت ءماجىلىسى «قازاقستان رەسپۋبليكاسى مەن ازيا دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ (جاي وپەراتسيالار) (كونترتسيكلدىق دامۋدى قولداۋ) تۋرالى» ق ر زاڭ جوباسىن قابىلدادى.
«بۇل كەلىسىممەن ازيا دامۋ بانكىنىڭ كونترتسيكلدىق دامۋعا قولداۋ كورسەتۋ ءۇشىن قارجىلاندىرۋ ماقساتىندا ءبىر ميلليارد دوللار كولەمىندە قارجى بەرۋ ماسەلەسى رەگلامەنتتەلەدى»، - دەدى دەپۋتات ماۋلەن اشىمبايەۆ، زاڭ جوباسى بويىنشا قورىتىندىنى ۇسىنىپ.
«ءبىز قولعا العان بۇل زاڭ جوباسى ۇكىمەت قابىلداعان باعدارلامالاردى قولداۋ ءۇشىن رەسپۋبليكالىق بيۋدجەت تاپشىلىعىن قارجىلاندىرۋ ماقساتىندا قارىز بەرۋدى رەتتەيدى. ۇكىمەتتىڭ اقپاراتتارى بويىنشا، بۇل قارجى ا د ب ارنايى قورىمەن ساقتالعان. ۇكىمەتتىڭ ۇندەۋىن نازارعا الا وتىرىپ، كونترتسيكلدىق دامۋدى قولداۋعا ارنالعان جاي وپەراتسيالارعا قارىز بەرۋدى راتيفيكاتسيالاۋ ماسەلەسىن كۇن تارتىبىنە ەنگىزۋدى ۇسىنامىن»، - دەدى ۆيكتور روگاليەۆ دەپۋتاتتىق كورپۋسقا.
«قارىز 2016-جىلدىڭ بيۋدجەت تاپشىلىعىن قارجىلاندىرۋعا باعىتتالادى. بۇل قارجى ەكونوميكانىڭ باسەكەلەستىگىن ارتتىرۋ بويىنشا ستراتەگيالىق شارالاردى ورىنداۋ ءۇشىن وتاندىق ەكونوميكانى ىنتالاندىرۋ مەن نەگىزگى باسىم باعىتتارعا جۇمسالادى. ازيا دامۋ بانكىنىڭ ءبىر ميلليارد دوللار كولەمىندەگى قارىزى بەس جىل مەرزىمىنە بەرىلەدى، ونىڭ ىشىندە ءۇش جىلدىق جەڭىلدىكتى كەزەڭ بار»، - دەپ حابارلادى قارجى ءمينيسترى باقىت سۇلتانوۆ.
پارلامەنت وتىرىسىنىڭ كۋلۋارىندا قازاقستاننىڭ ۇلتتىق ەكونوميكا ءمينيسترى ەربولات دوسايەۆ بۇل قارىزدىڭ 2016-جىلى قولدانىلاتىنىن مالىمدەدى.
«ولار بىزگە مۇنى شارتتى تۇردە بەرىپ وتىر، بيىلعى جىلدىڭ سوڭىنا دەيىن. ال ءبىز بيۋدجەت تاپشىلىعىن 2016-جىلدىڭ قاڭتارىنان باستاپ قارجىلاندىرامىز. ەكى قارىز قاراستىرىلعان: بىرەۋى ازيا دامۋ بانكىنەن - جەڭىلدىكپەن ۇزاق مەرزىمگە، ال ەكىنشىسى دۇنيەجۇزىلىك بانكتەن بالامالى سوماعا»، - دەدى جۋرناليستەرگە ەربولات دوسايەۆ.
ايتا كەتەيىك، بۇعان دەيىن ازيا دامۋ بانكىنىڭ قازاقستانعا ءبىر ميلليارد دوللار كولەمىندە قارىز بەرۋ تۋرالى كرەديتتى ماقۇلداعانى ءمالىم بولدى.
