قازاقستان ازيا ينفراقۇرىلىمدىق ينۆەستيتسيالار بانكىنىڭ قۇرىلتايشى مۇشەسى بولۋعا ۇمتىلادى - ءماجىلىس

استانا. قازاقپارات - بۇگىن ءماجىلىستىڭ جالپى وتىرىسىندا «ازيا ينفراقۇرىلىمدىق ينۆەستيتسيالار بانكى كەلىسىمىنىڭ باپتارىن راتيفيكاتسيالاۋ تۋرالى» زاڭ جوباسى ماقۇلداندى.

ازيا ينفراقۇرىلىمدىق ينۆەستيتسيالار بانكى تۋرالى كەلىسىم 2015-جىلى 29- ماۋسىمدا بەيجىڭدە جاسالعان بولاتىن. قازاقستاندى قوسا العاندا بانكتىڭ قۇرىلتايشىسى ەلۋ جەتى مەملەكەت بولىپ تابىلادى. ونىڭ ىشىندە وتىز جەتىسى ازيالىق، جيىرماسى وڭىرلىك ەمەس ەلدەر بولىپ تابىلادى. ال ءىرى اكتسيونەرلەرى - قىتاي، رەسەي مەن ءۇندىستان.

«بانكتىڭ جارعىلىق كاپيتالى 100 ميلليارد ا ق ش دوللارىن قۇرايدى جانە تولەنەتىن اكسيالاردان (20 ميلليارد) جانە تالاپ ەتۋ بويىنشا تولەۋگە جاتاتىن اكسيالاردان (80 ميلليارد) تۇرادى. بانك كاپيتالىنىڭ وڭىرلىك مۇشەلەرىنىڭ ۇلەسى 75 پايىزدى، وڭىرلىك ەمەس مۇشەلەرىنىڭ ۇلەسى 25 پايىزدى قۇرايدى. سول ارقىلى شەشۋشى داۋىس بەرۋ قۇقىعى ازيالىق ەلدەردە قالادى. شتاب-پاتەرى بەيجىڭدە ورنالاسادى»، - دەيدى ۇلتتىق ەكونوميكا ءمينيسترى ەربولات دوسايەۆ.

ونىڭ ايتۋىنشا، كەلىسىم كۇشىنە ەنگەن ساتتەن باستاپ قازاقستان رەسپۋبليكاسى بانكتىڭ قۇرىلتايشى مۇشەسىنە اينالادى جانە وزىنە كەلىسىمدە كوزدەلگەن مىندەتتەمەلەرىن الادى.

بانك كاپيتالىنىڭ بولىنۋىنە سايكەس، قازاقستاننىڭ بانك كاپيتالىنداعى جالپى ۇلەسى 729,3 ميلليون ا ق ش دوللارىن نەمەسە 0,7 پايىزدى قۇرايدى. تولەنەتىن كاپيتال 145,9 ميلليون دوللارىن قۇراپ، ول 5 ترانشپەن 29,2 ميلليون ا ق ش دوللارى مولشەرىندە جىل سايىن تولەنەتىن بولادى.

«تۇتاستاي العاندا، الەمدەگى قيىن ەكونوميكالىق جاعداي اياسىندا وسى كەلىسىمدى راتيفيكاتسيالاۋ قازاقستانعا بانك ارقىلى ينفراقۇرىلىمدىق جوبالاردى ۇزاق مەرزىمدى جانە قولايلى كرەديتتىك رەسۋرستار تارتۋعا مۇمكىندىك بەرەدى. بۇل ەكونوميكانىڭ دامۋىنا جانە ازياداعى وڭىرلىك ينتەگراتسيا دەڭگەيىن ارتتىرۋعا وڭ اسەرىن تيگىزەدى»، - دەدى ۇلتتىق ەكونوميكا ءمينيسترى ەربولات دوسايەۆ.

اۆتور: قانات مامەتقازى ۇلى