رينات زايىتوۆتىڭ اكەسى بالاسى ايتقان شىندىقتان قورقاتىنىن ايتتى
ۇلىنىڭ 14 جاسىندا جارىمەن ايىرىلىسىپ كەتكەن ول ريناتتىڭ قادىرىن كەش تۇسىنگەنىن اشىق ايتتى.
بۇل تۋرالى Qazaq.kz حابارلايدى.
تانىمال ايتىسكەردىڭ اكەسى بۇل ارەكەتىن جاقسىلىققا جورىدى. ريفحات زايىتوۆ بوتەن وتباسىن قۇرماعاندا، اناسىمەن قالعان رينات اياگوزدەن سەمەيگە كوشپەي، اقىندىق جولعا تۇسپەي قالۋى دا مۇمكىن ەكەنىن ايتادى.
«سەمەيدە ريناتقا جاقسى ادامدار كەزدەستى، جامان ادامدار كەزدەسسە، بالام جامان جولعا ءتۇسىپ كەتەر ەدى»، - دەيدى اقىننىڭ اكەسى.
ريفحات زايىتوۆ ۇلىنىڭ 9-سىنىپقا دەيىن قولىنا دومبىرا ۇستاماعانىن اڭگىمەلەي وتىرىپ، ونىڭ بويىنداعى اقىندىق قاسيەتى قانمەن كەلگەنىن باياندادى. اششى شىندىقتى جىرلاعان ۇلىن اكەسى ماقتانىشپەن ەسكە الىپ، حالىقتىڭ ءسوزىن سويلەگەنىنە قۋانعانىن دا جاسىرمادى. بيلىكتى سىناعان ريناتتى جامان اتتى ەتىپ كورسەتكەن باسشىنىڭ جاندايشاپتارى ەكەنىن العا تارتتى.
«ريناتقا قاستاندىق جاسالدى دەگەن وتىرىك. بۇل بىرەۋلەردىڭ بوس اڭگىمەسى. وسى سوزگە ءوزىم سەنىپ قالعان كەزدەرىم بولدى»، - دەيدى ريفحات زايىتوۆ اڭگىمەسىندە.
ۇلىنىڭ تاعدىرىنا الاڭدايتىن اكە ريناتقا قاسكويلەردىڭ جازىم جاساۋىنان قورقادى ەكەن.
ايتسە دە، ريفحات زايىتوۆ ۇلىنىڭ ايتىسقا شىعۋىنا قارسى ەمەس. ونىڭ پىكىرىنشە، قاتەلەسپەيتىن ادام جوق، بيلىكتەگى كىشكەنە كەمشىلىكتى ءبىر ادامنىڭ ايتىپ وتىرعانى دا دۇرىس.
باسقا حانداردىڭ قاسىندا دا توقتا دەپ ايتاتىن ادامدارى بولعان، ەل باسقاراتىن تۇلعاعا ەل اراسىنداعى ءسوزدى جەتكىزەتىن ادامدار بولۋى كەرەك دەيدى.
«ايبەك قاليەۆ سەكىلدى جىگىتتەر دە بار. ايتايىن دەپ باتا الماي جۇرگەندەر بار، بەرى جاعىنا بارىپ، قايتىپ جۇرگەن اقىندار بار.
رينات ەلگە جاساعان جاقسىلىعى، ەلدىڭ ارمانىن ايتقانى الدىنان شىعادى. باعىتىڭنان قايتپا»، - دەدى اقىننىڭ اكەسى.
