الەم رومانستارى سايىسىندا رەسەيلىك ونەرپاز ابايدىڭ ءانىن شىرقاپ، جەڭىسكە جەتتى

استانا. قازاقپارات - ماسكەۋدە وتكەن الەم رومانستارى سايىسىندا ۇلى اقىن ابايدىڭ «ايتتىم سالەم، قالامقاس» اتتى تۋىندىسى قويىلدى.

رومانستى رەسەيدىڭ ساحنا تورىندە ايتقان ماسكەۋ مەملەكەتتىك بالالار مۋزىكالىق تەاترىنىڭ ءسوليسى دەنيس بولدوۆ پەن كراسنويارسك ولكەسى اتىنان قاتىسقان. سيەۆاستيان مارتىنيۋك بۇل رومانستى اقىننىڭ 170 جىلدىعى قۇرمەتىنە ارناپ شىرقاعاندىقتارىن ايتتى.

وسىلايشا، «ايتتىم سالەم، قالامقاستاعى» عاشىق جىگىتتىڭ كوڭىلى، ونداعى سەزىمنىڭ سۇلۋلىعى، جولداعان ىستىق سالەمى بۇل جولى ماسكەۋدىڭ تورىندە تىڭدارمانعا ءان بولىپ ۇسىنىلدى. كورەرمەن اقىن ابايدىڭ جان دۇنيەسىنە، شىعارماشىلىعىنا ءۇڭىلىپ، رياسىز قۇرمەت، ىقىلاسىن ءبىلدىردى.

اقتىق سىندا قازاق قالامگەرى ابايدىڭ عۇمىرلى جىرىنا جان بىتىرگەن بايقاۋ قاتىسۋشىلارى نازاردان تىس قالمادى. «ايتتىم سالەم، قالامقاس» دەپ ماسكەۋدىڭ ءتورىن انمەن تەربەگەن 25 جاستاعى ۇمىتكەر دەنيس بولدوۆ ءۇشىنشى ورىندى، ال كراسنويارسك ولكەسىنەن قاتىسقان 21 جاستاعى ستۋدەنت سيەۆاستيان مارتىنيۋك ءبىرىنشى ورىندى جەڭىپ الدى. الەم رومانستارى بايقاۋىنىڭ ۇيىمداستىرۋ القاسى ەندى ابايدىڭ «ايتتىم سالەم، قالامقاس» شىعارماسىن سايىستىڭ التىن- قورىنا ەنگىزۋدى ۇيعاردى.

جۇلدەنى تابىستاۋ مارتەبەسى ءبىزدىڭ ءوڭىردىڭ وكىلدەرىنە بۇيىرىپ، الەمنىڭ 15 ەلىنەن، رەسەيدىڭ 62 قالاسىنان قاتىسقان سايىستا جەڭىمپازدارعا جۇلدەنى وبلىستىق مادەنيەت باسقارماسىنىڭ باسشىسى ك. ايداربەكوۆا تاپسىردى.

 ايتا وتەيىك، حالىقارالىق جاس رومانس ورىنداۋشىلارىنىڭ بايقاۋى بيىل ماسكەۋدە ХІХ رەت ۇيىمداستىرىلدى. وعان الەمنىڭ 438 ۆوكال ورىنداۋشىلارى جولداما العان. ايتۋلى ونەر بايقاۋىندا رەسەيدىڭ ەڭبەك سىڭىرگەن ونەر قايراتكەرى گالينا پرەوبراجەنسكايا قازاق رومانسىنا دەگەن ەرەكشە قۇرمەتىن جەتكىزدى، دەپ حابارلادى و ق و اكىمىنىڭ باسپا ءسوز قىزمەتى.