استانادا قازاقستان پرەزيدەنتىنە سىيعا بەرىلگەن ساعاتتار كوللەكسياسى كوپشىلىك نازارىنا ۇسىنىلدى

استانا. قازاقپارات - بۇگىن استاناداعى ق ر تۇڭعىش پرەزيدەنتى مۋزەيىندە «ۋاقىت قۇدىرەتى» كورمەسى اشىلدى.

العاش رەت مۋزەي جيناقتارىنان ساعاتتاردىڭ كوللەكسياسى كوپشىلىك نازارىنا ۇسىنىلىپ وتىر.

كورمەنى شىن مانىندە بىرەگەي ءارى سيرەك دەپ ايتۋعا بولادى، ويتكەنى ەكسپوزيسيادا ساعات جاساۋ ونەرىنىڭ بيىك شىڭىنا جەتكەن 60 تان استام ءار ءتۇرلى جانە سيرەك كەزدەسەتىن تۋىندىلار ۇسىنىلادى. كوللەكسيانىڭ نەگىزىن قازاقستان رەسپۋبليكاسى تۇڭعىش پرەزيدەنتى مۋزەيىنە مەملەكەتتىك ساقتاۋعا بەرىلگەن نۇرسۇلتان نازاربايەۆقا ءار جىلداردا تابىس ەتىلگەن ديپلوماتيالىق سىيلىقتار قۇرايدى.

ەرەكشەلىگىنە قاراي، كورمەگە قويىلاتىن جادىگەرلەر اراسىندا مەحانيكالىق، كۆارتستى جانە ەلەكتروندى ساعاتتار، سىيعا بەرۋشىلەردىڭ ارنايى تاپسىرىسىمەن جاسالعاندار، ⅩⅨ عاسىردان سىر شەرتەتىن انتيكۆارلىق جانە باسقا دا كوپتەگەن ساعاتتار بار. كوللەكسيادا قالتا، قول، ۇستەل، قابىرعا، كاميندىك جانە ەدەنگە قويىلاتىن ساعاتتار توپتاماسى ەرەكشە كوز تارتادى.

«بۇل ەكسپوزيتسيانىڭ ق ر تۇڭعىش پرەزيدەنتى مۋزەيىنىڭ 2015 -جىلعى كورمە ماۋسىمىن اياقتاۋىنا سايكەس كەلۋى بەكەر ەمەس. ويتكەنى، ۋاقىت جايلى ويلانۋعا جانە ونىڭ سونشالىقتى جىلدامدىعىنا ءبىر ساتكە كوز جۇگىرتىپ، جىلدى قورىتىندىلاۋعا مۇمكىندىك بەرەدى. كورمە مەرەكەلىك شاتتىق كوڭىلدى بىرگە بولىسۋگە جانە بارلىق قوناقتارعا جاڭاجىلدىق كوڭىل- كۇي سىيلايدى»، - دەيدى ۇيىمداستىرۋشىلار.

ايتا كەتەيىك، كورمە 2016 -جىلدىڭ 31 -قاڭتارىنا دەيىن جالعاسادى.

اۆتور: رۋسلان عابباسوۆ