قازاقستاندا ۇلى بريتانيانىڭ وزىق تاجىريبەسى نەگىزىندە جاڭا پوشتالىق يندەكستەر ەنگىزىلمەك
بۇل تۋرالى بۇگىن پارلامەنت ماجىلىسىندە «پوشتا تۋرالى» زاڭ جوباسىن تانىستىرعان ينۆەستيتسيالار جانە دامۋ ۆيتسە-ءمينيسترى ساكەن سارسەنوۆ ءمالىم ەتتى.
«بۇگىنگى كۇنى پوشتا قىزمەتىن پايدالانۋشىلاردىڭ مەكەنجايلارى پوشتا وپەراتورىنىڭ وندىرىستىك نىساندارىنا بەرىلگەن. كوپ جاعدايدا بۇل مەكەنجايلار ناقتى بولمايدى، كوشە اتتارى اۋىسىپ وتىرادى، ۇيلەردىڭ نومىرلەرى بەلگىلەنبەيدى، كەيدە كوشەلەرگە ۋاقىتشا اتاۋ بەرىلەدى. وسىعان بايلانىستى، ءبىز ۇلى بريتانيانىڭ وزىق تاجىريبەسىنىڭ نەگىزىندە جاڭا پوشتالىق يندەكستەردى ەنگىزۋدى جوسپارلاپ وتىرمىز»، - دەيدى ۆيتسە- مينيستر.
ونىڭ ايتۋىنشا، جاڭا پوشتالىق يندەكستەر تەك پوشتا وپەراتورلارىنىڭ وندىرىستىك نىساندارىنا عانا ەمەس، سونىمەن قاتار بارلىق تۇرعىن ءۇي جانە تۇرعىن ەمەس عيماراتتارعا بەرىلەتىن بولادى. بۇل پايدالانۋشىلاردىڭ مەكەنجايلارىن ناقتى انىقتاۋعا جانە جازباشا حات-حابارلاردى سۇرىپتاۋدى تەزدەتۋگە مۇمكىندىك بەرەدى. ايتا كەتەرلىگى، بيىلدان باستاپ استانا جانە پەتروپاۆل قالالارىندا پيلوتتىق نەگىزدە جاڭا پوشتالىق يندەكستەردى بەرۋ جۇمىستارى جۇرگىزىلە باستادى.
«بۇدان بولەك، زاڭ جوباسىندا گيبريدتىك جونەلتىلىم قىزمەتىن كورسەتۋدىڭ نەگىزگى ەرەجەلەرى بەكىتىلەدى. بۇل قاعاز جۇزىندەگى قاراپايىم پوشتا جونەلتىلىمىنىڭ كەيبىر كەزەڭدەردەن وتپەي- اق، گيبريدتىك جونەلتىلىمدى ادرەساتقا تەز ارادا جەتكىزۋگە مۇمكىندىك بەرەدى. قازىرگى ۋاقىتتا وسى ءتاسىلدى قر جوعارعى سوتى «قازپوشتا» ا ق- مەن بىرلەسىپ اتقارۋدا. ياعني، پوشتا بولىمشەلەرى سوت حابارلاماسىن ەلدىڭ شالعاي اۋداندارىنا دەرەۋ جەتكىزۋدى قامتاماسىز ەتىپ وتىر. وسى تاجىريبەگە باس پروكۋراتۋرا، سالىق كوميتەتى جانە استانا قالالىق ىشكى ىستەر دەپارتامەنتى قىزىعۋشىلىقتارىن بىلدىرۋدە»، - دەيدى ۆيتسە- مينيستر س. سارسەنوۆ.
اۆتور: قانات مامەتقازى ۇلى
