قازاقستاننىڭ ەڭ سۇلۋ قىزىنا سىيلىق رەتىندە جاساۋ بەرىلدى - فوتو

استانا. قازاقپارات - «قازاقستان ارۋى-2015» اتانعان اقتاۋلىق ءاليا مەرگەنبايەۆا اقشالاي سىيلىقتان بولەك «التىن وردا» اۆتورلىق ديزاين ۇيىنەن قازاقتىڭ ءداستۇرلى جاساۋىن الدى، - دەپ حابارلايدى Tengrinews.kz ءتىلشىسى.

توپتاماعا جاس كەلىنگە قاجەتتى بارلىق بۇيىم - قولدان تىگىلگەن كورپەلەر، جاستىقتار، سونىمەن قاتار، ءداستۇرلى داستارحان كىردى.

مۇنىڭ بارلىعى قازاقستاندىق ديزاينەر ىرزا تۇرسىنزادانىڭ قولىنان شىققان، ول اتا-بابادان كەلە جاتقان ءداستۇردى ناسيحاتتاۋمەن اينالىسادى.

ايتا كەتەيىك، جاساۋ «قازاقستان ارۋى» بايقاۋىنا قاتىسۋشىلارعا ەڭ كەرەك دۇنيە. سوڭعى ءبىر جىلدىڭ ىشىندە وسى تيتۋلدى يەلەنگەن ءۇش قىز - جاننا جۇماليەۆا (قازاقستان ارۋى-2012)، اينۇر تولەۋوۆا (2013) جانە ايداي يسايەۆا (2014) تۇرمىسقا شىقتى. اينۇر مەن ايداي انا اتانىپ ۇلگەردى. ءاليا مەرگەنبايەۆا ازىرشە تۇرمىسقا شىقپايتىنىن، دەگەنمەن سىيلىقتى العانىنا قاتتى قۋانعانىن جەتكىزدى.