مۋزەيلەر عىلىمي مەكەمەلەر، ج و و- لار، مۇراعاتتار مەن كىتاپحانالار ىنتىماقتاستىعىنىڭ تىرەك ورتالىعىنا اينالۋى ءتيىس - مينيستر

استانا. قازاقپارات - قازاقستاننىڭ مۋزەيلەرى عىلىمي مەكەمەلەردىڭ، ۋنيۆەرسيتەتتەردىڭ، مۇراعاتتاردىڭ، كىتاپحانالاردىڭ ءوزارا ارەكەتتەستىگى مەن ىنتىماقتاستىعىنىڭ تىرەك ورتالىعىنا اينالۋى ءتيىس، - دەدى ق ر مادەنيەت جانە سپورت ءمينيسترى ا. مۇحامەدي ۇلى ق ر پرەزيدەنتىنىڭ «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» اتتى جولداۋىن تالقىلاۋعا ارنالعان ۆەدومستۆونىڭ كەڭەيتىلگەن القا جيىنىندا.

بۇل تۋرالى ق ر م س م باسپا ءسوز قىزمەتىنەن حابارلادى.

قازاقستان رەسپۋبليكاسى مادەنيەت جانە سپورت مينيسترلىگىنىڭ كەلە جاتقان جاڭا جىلداعى قىزمەتىنىڭ پەرسپەكتيۆالارى تۋرالى سوزىندە ارىستانبەك مۇحامەدي ۇلى وتاندىق مۋزەيلەر جۇمىسىن جاڭعىرتۋ قاجەتتىگىنە باسا توقتالىپ ءوتتى. مۋزەي قىزمەتىنىڭ باستى باعىتى عىلىمي زەرتتەۋ سالاسىندا جۇرگىزىلۋى ءتيىس. ول تاريح، ارحەولوگيا، رەستاۆراتسيا، ونەرتانۋ، مادەني- بىلىمدىك ءىس- شارالار، كادەسىي يندۋسترياسى، سەرۆيس جانە ت. ب. باعىتتار بويىنشا قالىپتاساتىن بولادى.

«سالانىڭ تۋريستىك الەۋەتىن دامىتۋ ماقساتىندا «ەسىك»، «ەجەلگى تاراز»، «بەرەل» قورىق- مۋزەيلەرىنىڭ اۋماعىندا ينتەرنەت- ءدامحاناسى، وقۋ جانە كورمە زالدارى، كادەسىي پاۆيلوندارى بار ۆيزيت- ورتالىقتار قۇرىلعان جانە ولار كەلۋشىلەر اراسىندا ۇلكەن تابىسقا يە»، - دەدى ۆەدومستۆو باسشىسى.

سونداي- اق ول حالىقارالىق ىنتىماقتاستىقتى جانداندىرۋ اياسىندا مينيسترلىك شەتەلدىك عالىمدارمەن تىعىز ءارى ۇزدىكسىز بايلانىس جاساپ جاتقاندىعىن دا ايتىپ كەتتى. ونىڭ پايىمداۋىنشا، بەرەل قورعانى، «تامعالى» ارحەولوگيالىق لاندشافتىڭ پەتروگليفتەرى جانە تاعى دا باسقا قازاقستاننىڭ ءبىرقاتار بەلگىلى ارحەولوگيالىق ەسكەرتكىشتەرىن ساقتاۋ جانە زەرتتەۋ بويىنشا بىرلەسكەن جوبالارعا قاتىسۋعا نورۆەگيالىق جانە نەمىس عالىمدارى قىزىعۋشىلىق تانىتۋدا.

«بۇنداي حالىقارالىق ىنتىماقتاستىق قازاقستانداعى عىلىمي- زەرتتەۋ جوبالارىنا شەتەلدىك ينۆەستيتسيالار تارتۋعا مۇمكىندىك بەرەدى»، - دەگەن پىكىردە ا. مۇحامەدي ۇلى.