اتاقتى زىلتەمىرشى يليا يلين جەكە ومىرىندەگى قيىن كەزەڭدەر تۋرالى اعىنان جارىلىپ اڭگىمەلەدى

استانا. قازاقپارات - اتاقتى قازاقستاندىق زىلتەمىرشى يليا يلين جەكە ومىرىندە كەزدەسكەن قيىندىعى جايىندا اعىنان جارىلا اڭگىمەلەدى.

سپورتشى جۇرەك سىرىن دانا نۇرجىگىتتىڭ «دارا جول» باعدارلاماسىندا قالىڭ كورەرمەنگە بايانداپ بەردى.

يليا يلين اۋىر اتلەتيكادان قازاقستان قۇراماسىنا قوسىلۋ ءۇشىن الماتىعا ەڭ العاش 2005 -جىلى جيىنعا كەلەدى. جاس جىگىت كوپ ۇزاماي جاتتىعۋ زالىندا ناتاليا ەسىمدى قىزبەن تانىسادى. ناتاليا كاسىبي تۇرعىدا گاندبولمەن اينالىسقان.

«قاراسام، سۇلۋ قىز ءجۇر. بوتاداي كوزدەرىن، سۇلۋلىعىن بىردەن ۇناتتىم. مەن دە وعان بىردەن ۇناپپىن»، - دەيدى يليا العاشقى اسەرى جايلى.

ءبىر-بىرىمەن تىعىز ارالاسىپ كەتكەن سپورتشىلاردىڭ جاتتىعۋ ورنىنداعى بولمەلەرى دە جاقىن بولعان. 2005 -جىلدان باستاپ ءبىر جىلداي دوس بولىپ جۇرگەن يليا مەن ناتاليا ءبىر جىلدان سوڭ بىرگە تۇرا باستاعان، تەك ۇيلەنبەگەن.

«ءبىزدىڭ ماحابباتىمىز كۇننەن- كۇنگە كۇشەيدى. ءبىر كەزدەرى جاتتىقتىرۋشىلارىمىز ەكەۋىمىزدى ايىرعىلارى كەلدى»، - دەيدى يليا.

يليانىڭ ايتۋىنشا، باپكەرلەر ناتاشانىڭ ماحابباتى يليانىڭ سپورتتاعى كورسەتكىشىنە كەرى ىقپالىن تيگىزەدى دەپ ويلاعان.

«رومەو مەن دجۋلەتتاداي بولدىق. جاتتىقتىرۋشىلارىمىز مونتەككي مەن كاپۋلەتتي اۋلەتى سەكىلدى، ءبىراق، ونىڭ ورنىنا گاندبول مەن اۋىر اتلەتيكا. اۋىر اتلەتيكاداعى جاتتىقتىرۋشىلار «جوق، بولمايدى» دەپ ايقايلايدى، گاندبولداعىلار نە بولىپ جاتقانىن تۇسىنبەي اڭ- تاڭ»، - دەيدى يلين اڭگىمە بارىسىندا.

جاس جىگىتتىڭ سەزىمى جايىندا سول كەزدەگى سپورت جانە تۋريزم باسقارماسىنىڭ باسشىسى داۋلەت تۇرلىحانوۆ تا ءوز ويىن ءبىلدىرىپ، چەمپيوننىڭ ماحاببات ماسەلەسىن شەشۋگە ارالاسقان كورىنەدى.

«مەن جاس جىگىتپىن، چەمپيونمىن. بۇل جاس بويجەتكەن. بۇل ىسكە داۋلەت بولات ۇلى دا ارالاستى. مەنىڭ جاتتىقتىرۋشىم اشۋلى. ۆيلوري پاك ءتىپتى «بۇل قىز كەدەرگى كەلتىرىپ ءجۇر» دەپ شۋ كوتەرىپ، ناتاليانىڭ ۇستىنەن ارىز دا جازعان»، - دەيدى يليا سول ءبىر قيىن ءسات جايلى.

«قازىر كۇلكىلى عوي. ال سول كەزدە جىلاعانىمىزدى كورسەڭىز، مەن بار بولعانى 15-16 جاستامىن، ال ناتاشا 19 جاستا. داۋلەت بولات ۇلى «نەمەنەگە ايقاي كوتەرەسىڭدەر؟ مۇمكىن ەكەۋىن ۇيلەندىرىپ، باسپانا بەرەرمىز» دەيدى. ال جاتتىقتىرۋشىلارىم ءبىزدىڭ ماحابباتىمىزدىڭ شىنايى ەكەندىگىنە سەنبەدى»، - دەيدى چەمپيون.

بۇگىندە قوس عاشىق ەشكىمگە رەنجىمەيتىنىن العا تارتادى. تەك يليانىڭ باپكەرلەرى ناتاليانىڭ وليمپياداعا قاتىسۋىنا كەدەرگى بولعانىنا كۇرسىنەدى.

«ولاردىڭ وزدەرى سارى ۋايىمعا سالىندى، ءۇمىت ارتقان ادامى - مەن، جەڭىسكە قالاي دا جەتۋ قاجەت. بارىنە جەڭىس كەرەك، ال بىزگە ماحاببات كەرەك دەگەندەي، وسى قاجەتتىلىكتەر ءبىر- بىرىنە قاراما- قايشى كەلدى»، - دەيدى زىلتەمىرشى.

يليانىڭ جاتتىقتىرۋشىلارى جاس جۇپتىڭ ەكەۋى دە وليمپياداعا بارسا ءبىر-ءبىرىن مازالاپ، يليننىڭ جەڭىلىپ قالاتىنىنا قورىققان. ال چەمپيونعا عاشىق بولعان ناتاليا سپورتتىق مانسابىنداعى ساتسىزدىككە ابدەن جىلاعان.

«قىز ەمەس پە، ابدەن جىلادى، مۇنىڭ بار جازىعى - عاشىق بولعاندىعى. قولىمنان كەلگەنى سول، بارلىعى ويداعىداي دەدىم دە، پاتەر جالداپ ورنالاستىردىم. ءبىر قىزىمىز بولسا دەپ كوپتەن بەرى ارمانداپ جۇرگەنبىز. قىز بوسانساڭ، اتىن ميلانا قويامىز دەيمىن»، - دەپ ءسوزىن جالعاستىردى يليا.

2009 -جىلدىڭ باسىندا ناتاليا جارىسقا قاتىسىپ جۇرگەندە، جۇكتى بولعانىن ءبىلىپ، عاشىعىنا حابارلاعان ەكەن. ءبىراز ۇنسىزدىكتەن سوڭ عانا، يليا توسىن جاڭالىققا قۋانىشىن ءبىلدىرىپ، سۇيىكتىسىن قۇتتىقتاعان. ال ناتالياعا تۇرمىسقا شىعۋعا لوندون وليمپياداسىنان كەيىن ۇسىنىس جاساعان.

«لوندون وليمپياداسىنان كەلگەننەن كەيىن كىلتتىڭ دوڭگەلەگىن الاقانىما سالىپ، كۇيەۋگە شىق دەپ ۇسىنىس ءبىلدىردىم. ناتاشا ساقينانى الىپ، ۇسىنىسىمدى قابىلدادى. كەيىن ءبىراق، باسقا ساقينا الىپ بەردىم»، - دەيدى اتاقتى زىلتەمىرشى.

بۇگىندى سپورتشى وتباسى ميلانا ەسىمدى قىزىن ءوسىرىپ، باقىتتى وتباسىلى ءومىر سۇرۋدە. 2016 -جىلى ريو دە جانەيرودا وتەتىن وليمپيادادان سوڭ، يليا يلين قازاق تىلىندە ەركىن سويلەۋگە ۋادە بەردى.

دەرەككوز: NUR. KZ