ورتالىق ازيا بويىنشا زەرگەرلىك التىن بۇيىمدار ساتۋدىڭ جالعىز ورتالىعى الماتىدا اشىلدى

الماتى. قازاقپارات - بۇگىن الماتىدا «التىن بازار» ساۋدا ورتالىعى اشىلدى.

ول بۇكىل ورتالىق ازيا بويىنشا زەرگەرلىك بۇيىمدار ساتۋعا مامانداندىرىلعان جالعىز حاب(ورتالىق).

ورتالىقتىڭ اشىلۋ راسىمىنە الماتى قالاسىنىڭ باسشىلىعى قاتىستى، دەپ حابارلادى الماتى قالاسى اكىمىنىڭ باسپا ءسوز قىزمەتىنەن.

ەكى قاباتتى ساۋدا ورتالىعىندا 1400 جاڭا جۇمىس ورنى قامتىلعان. ورتالىقتىڭ جالپى اۋدانى - 10000 شارشى مەتر، ال ساۋدا جاساۋعا ارنالعان اۋماعى 5500 شارشى مەتردى قۇرايدى.

«التىن بازار» ساۋدا ورتالىعى قالاداعى كەڭ كولەمدى ساۋدا كەشەنىنىڭ ءبىر بولىگى بولىپ تابىلادى. وعان «ارمادا»، «Grand Park Almaty-1»، «Grand Park Almaty-2» سىندى ساۋدا ورتالىقتارى ەنەدى.

ايتا كەتەلىك، ساۋدا كەشەنىنىڭ جالپى اۋماعى - 250000 شارشى مەتر. مۇندا بارلىعى 12 مىڭعا جۋىق جۇمىس ورنى اشىلماق. ال بارلىق ساۋدا ورتالىقتارىنىڭ كولىك قويۋعا ارنالعان الاڭدارىنا 3 مىڭ شاماسىندا كولىك سيادى.

اۆتور: جاپپاربەرگەن ايبوتا