كۇردىستاننىڭ تاۋەلسىزدىگى جونىندە رەفەرەندۋم ءوتۋى مۇمكىن
سولتۇستىك يراك كۇرد اۆتونومياسىنىڭ جەتەكشىسى، كۇردىستان دەموكراتيالىق پارتياسىنىڭ ءتوراعاسى مەسۋت بارزاني ءوزى باسقاراتىن پارتيانىڭ ساياسي كەڭەسىنىڭ وتىرىسىندا كۇردىستاننىڭ تاۋەلسىزدىگى تۋرالى رەفەرەندۋمعا دايىندالۋ تۋرالى تاپسىرما بەرگەنى بەلگىلى بولدى. سولتۇستىك يراك كۇرد اۆتونومياسى بيلىگىنە جاقىن Rûdaw اگەنتتىگىنىڭ جازۋىنا قاراعاندا بارزاني بۇل ماسەلە بويىنشا كۇردتەردىڭ وزگە دە پارتيالارىنىڭ جەتەكشىلەرىمەن كەزدەسۋلەر كەرەكتىگىن ايتقان. ال، كۇردىستان دەموكراتيالىق پارتياسىنىڭ ىقپالدى قايراتكەرلەرىنىڭ ءبىرى اراس حاسو ميرحان وزدەرىنىڭ جاقىن كۇندەرى «كۇردىستان پاتريوتتارى ۇيىمى» وكىلدەرىمەن كەزدەسەتىندىكتەرىن ايتقان. ودان كەيىن وزگە كۇرد پارتيالارى جەتەكشىلەرىمەن كەزدەسۋ جوسپارلانىپتى.
نەگىزى مەسۋت بارزاني كۇردىستاننىڭ تاۋەلسىزدىگىنە قاتىسى رەفەرەندۋم وتكىزۋ ۇسىنىسىن بۇدان بۇرىن دا ايتقان. 2014 -جىلدىڭ 3 -شىلدەسىندە سولتۇستىك يراك كۇرد اۆتونومياسى پارلامەنتىندە وسىنداي رەفەرەندۋم وتكىزۋ جونىندە ماسەلە قارالعان بولاتىن. الايدا، د ا ي ش تەرروريستەرىنىڭ موسۋل قالاسىن باسىپ الىپ، كەيىن يراك پەن سيريانىڭ ءبىراز جەرىندە لاڭ سالۋى رەفەرەندۋم ماسەلەسىن كەيىنگە قالدىرۋعا ماجبۇرلەگەن ەدى. سوندا دا بارزاني: «كۇردتەر ەشقاشان رەفەرەندۋم يدەياسىنان باس تارتپايدى. ءبىراق، قازىر د ا ي ش تەرروريستەرىمەن شايقاسىپ جاتىرمىز. ازىرگە، ەڭ باستى ماقساتىمىز تەرروريستەردى توقتاتۋ»، - دەگەن بولاتىن. بارزاني ا ق ش- قا جاساعان ءبىر ساپارىندا ۆيرجينا شتاتىنداعى كۇردتەرمەن كەزدەسىپ، سول جيىندا : «د ا ي ش- پەن سوعىستان كەيىن جاعداي وزگەرەدى. بۇرىن ەشكىم كۇرد مەملەكەتى دەگەن ءسوزدى ەستىگىسى كەلمەيتىن، قازىر ءبىراز مەملەكەت ءبىزدى اشىق قولداۋدا. ەشبىر مەملەكەت ءبىزدىڭ تاۋەلسىزدىگىمىزگە قارسى ەمەس»، - دەگەن ەدى. ەندى مىنە، رەفەرەندۋم وتكىزۋ تۋرالى ماسەلەنى قايتا پىسىقتاي باستادى.
وسى تۇستا اتاپ وتەر ءبىر جايت، مەسۋت بارزاني كۇردتەردىڭ تاۋەلسىزدىگى جونىندەگى رەفەرەندۋمعا كەيبىر ساياسي كۇشتەردى قاتىستىرماۋى دا مۇمكىن. اسىرەسە، كۇردىستان جۇمىسشى پارتياسى اتالاتىن سولشىل- تەرروريستىك توپتى بۇل ماسەلەگە ارالاستىرماۋى ىقتيمال. سونىمەن قاتار، YGD اتالاتىن سيرياداعى توپتى دا مەسۋت بارزاني كۇرد حالقىنىڭ تاۋەلسىزدىگىنە قاتىستى رەفەرەندۋمعا قاتىستىرماۋى عاجاپ ەمەس. ويتكەنى، بۇل توپتار مەن كۇردىستان دەموكراتيالىق پارتياسىنىڭ اراسىنداعى شيەلەنىس تەرەڭدەپ كەتكەن. ال، وڭىردەگى ءبىرقاتار مەملەكەتتەر بارزانيدى قولدايتىنى انىق. سەبەبى، مەسۋت بارزاني 1 -جەلتوقساندا ساۋد ارابياسىنا، ودان كەيىن تۇركياعا رەسمي ساپارمەن بارعان بولاتىن.
ازىرگە رەفەرەندۋمنىڭ ءوتۋ- وتپەۋى، بولا قالعان جاعدايدا قاي مەزگىلگە جوسپارلانعانى، «كۇردىستان» ۇعىمىنا قانداي اۋماقتاردىڭ كىرەتىندىگى جونىندە اقپارات جوق.
Kaznews.kaztrk.kz
