استانا پوليتسەيلەرى شىرشا ساتۋدىڭ زاڭدىلىعىن تەكسەرەدى

استانا. قازاقپارات - جاڭا جىل قارساڭىندا استانا قالالىق ىشكى ىستەر دەپارتامەنتى اكىمشىلىك پوليتسيا بولىمشەسىنىڭ قىزمەتكەرلەرى «شىرشا» جەدەل الدىن الۋ شارالارىن وتكىزەدى.

شارانىڭ ماقساتى - تابيعاتتى قورعاۋ ورگاندارىنا جاردەم بەرۋ بويىنشا قىلقان جاپىراقتى اعاشتاردى زاڭسىز كەسۋ، تاسىمالداۋ جانە ساتۋدىڭ جولىن كەسۋ.

ءى ءى د اكىمشىلىك پوليتسيا باسقارماسىنىڭ حابارلاۋىنشا، جەدەل الدىن الۋ شاراسى اياسىندا پوليتسيا قىزمەتكەرلەرى ەلوردا ماڭىنداعى «جاسىل بەلدەۋ» اۋماعىنان قىلقان جاپىراقتى جاس بۇتالاردىڭ زاڭسىز كەسىلۋىنە، ولاردىڭ ساۋدا نۇكتەلەرىندەگى زاڭسىز ساتىلىمىنا ەرەكشە نازار اۋداراتىن بولادى. پوليتسيا قىزمەتكەرلەرى مەن «استانا ورمانى» جانە «جاسىل ايماق» مەملەكەتتىك مەكەمەلەرى قىزمەتكەرلەرىنەن قۇرالعان جەدەل توپ جاس شىرشالاردى زاڭسىز كەسۋدىڭ الدىن الۋ ءۇشىن تاۋلىك بويىنا كەزەكشىلىك جاسايدى.

قىلقان جاپىراقتىلاردى زاڭسىز تاسىمالداۋدى بولدىرماۋ ءۇشىن جول-پاترۋل پوليتسيالارى دا كۇشەيتىلگەن تارتىپكە كوشەدى.

«قازىرگى تاڭدا استانادا قىلقان جاپىراقتى اعاشتاردى استانادا ساتۋدىڭ ءبىرقاتار ورىندارى بەلگىلەنگەن. بۇلار: «مەرەي» ورتالىق جانە شاعىن بازارى، «اسەم» ساۋدا ءۇيى، «سارىارقا»، «ماگنۋم»، «استىقجان»، «الما»، «جاننۇر»، «گۇلجان»، «وربيتا»، «جاستار» جانە «ارتەم» ساۋدا ورىندارى. ساتۋشىلاردىڭ بارلىعىندا رەسەيدەن اكەلىنگەن بولسا قىلقان جاپىراقتىلاردى اكەلۋ مەن ساتۋعا قاتىستى قۇجاتتارى بولۋى كەرەك»، - دەيدى ءى ءى د ءا پ ب باستىعىنىڭ ورىنباسارى يگور گوربۋنوۆ.

ونىڭ ايتۋنىشا، قازىردىڭ وزىندە استانادا قىلقان جاپىراقتى اعاشتاردى بەلگىلەنگەن ورىنداردا ساتۋعا قاتىستى زاڭسىزدىقتاردىڭ 6 فاكتىسى تىركەلگەن. جاڭا جىلدى قارساڭىنداعى «شىرشا» جەدەل الدىن الۋ شاراسى 31 -جەلتوقسانعا دەيىن جالعاساتىن بولادى.

 

اۆتور: قانات مامەتقازى ۇلى