الماتىدا باسىن قاتەرگە تىگىپ قاراقشىنى ۇستاۋعا كومەكتەسكەندەر ماراپاتتالدى

الماتى. قازاقپارات - قاراقشىنى ۇستاۋعا كومەكتەسكەن الماتىلىقتار ماراپاتتالدى.

بۇل تۋرالى بۇگىن الماتى ق. ءى ءى د باسپا ءسوز قىزمەتىنەن حابارلادى.

 الماتى قالاسىنىڭ ىشكى ىستەر دەپارتامەنتى باستىعىنىڭ بۇيرىعىمەن باقىتعالي پرلەپەسوۆ پەن ارتەم شيحيلەۆ ماراپاتتالدى. ولار وزدەرىنىڭ باتىل ارەكەتتەرىمەن، جۇك تاسىمالىمەن اينالىساتىن ج ش س اۋماعىنا قاراقشىلىق شابۋىل جاساعان قىلمىسكەرلەردىڭ ءبىرىن ۇستاعان.

«ەسكە سالا كەتەلىك، ۇستىمىزدەگى جىلدىڭ 26- قاراشاسىندا تۇندە شامامەن 3 ساعات 30 مينۋتتا بەيتانىس ەكى ادام، قورادان سەكىرىپ ءتۇسىپ، جەكە كاسىورىننىڭ اۋماعىنا زاڭسىز ەنگەن. ولار كۇزەتشىگە شابۋىل جاساپ، ونى بايلاپ تاستاعان. تاپانشامەن قورقىتىپ، بۋحالتەريا بولمەسىنىڭ قايدا ورنالاسقاندىعىن ايتۋىن تالاپ ەتكەن. وسى ساتتە كۇتپەگەن جەردەن كەلە قالعان وسى فيرمانىڭ قىزمەتكەرلەرى باقىتعالي پرلەپەسوۆ، الەكساندر شيحيلەۆ جانە ونىڭ ۇلى ارتەم كۇزەتشىنىڭ ەسىگىن قاعادى. ارتەم اكەسىن الىپ كەتۋگە كەلگەن ەكەن.

قاراقشىلار تەرەزە ارقىلى قاشا باستايدى. وسى ساتتە ولار قۋا جونەلەدى. الايدا، قاشقىنداردىڭ ءبىرى ارتەمدى تاپانشاسىمەن جارالادى. ابىروي بولعاندا جاراقاتى جەڭىل. وسىلايشا، وقيعا ورنىندا كۇدىكتىلەردىڭ ءبىرى ۇستالدى. ال ەكىنشىسىن كەيىن ءتارتىپ ساقشىلارى ۇستادى»، - دەدى الماتى ق. ءى ءى د اكىمشىلىك پوليتسيا باسقارماسى باستىعىنىڭ ورىنباسارى جاسۇلان بايكەنوۆ.

قارۋلى قىلمىسكەردى ۇستاۋدا باتىلدىق كورسەتىپ، قوعامدىق ءتارتىپتى قورعاۋعا ءوز ۇلەسىن قوسقاندارى ءۇشىن الماتىلىق ازاماتتار العىس حاتتار جانە ەستەلىك سىيلىقتارمەن ماراپاتتالدى. سونىمەن قاتار، ولارعا پوليتسيانىڭ قوعامدىق كومەكشىلەرى قاتارىنا ەنۋ ۇسىنىلدى.

اۆتور: جاپپاربەرگەن ايبوتا