اباي تانۋعا ارنالعان جاڭا ءۇش كىتاپ جارىق كوردى
پروفەسسور، قازاقستان رەسپۋبليكاسى مەملەكەتتىك سىيلىعىنىڭ يەگەرى مەكەمتاس مىرزاحمەت ۇلىنىڭ «حاكىم اباي مۇراسىن تانىپ ءبىلۋدىڭ 125 (1889-2014) جىلدىق تاريحىنان»، «مۇحتار اۋەزوۆ-ابايتانۋشى عۇلاما» مونوگرافيالىق ەڭبەكتەرىنىڭ جانە ول قۇراستىرىپ، العى ءسوزى مەن تۇسىنىكتەمەلەرىن جازعان «ابايدى وقى، تاڭىرقا...» اتتى عىلىمي جيناقتىڭ تانىستىرىلىمىن وتكىزدى.
بۇل كىتاپتاردا اباي تانۋدىڭ باستاۋلارى مەن بەلەستەرى، ۇلى جازۋشى مۇحتار اۋەزوۆتىڭ وسى سالاداعى تەڭدەسسىز ەڭبەگى جانە باسقا دا ىرگەلى زەرتتەۋشىلەردىڭ كوزقاراس-پايىمدارى عىلىمي تۇرعىدان تياناقتى ساراپتالىپ، تەرەڭ سارالانعان.
بەيبىتشىلىك جانە كەلىسىم سارايىندا تانىمال ادەبيەتتانۋشى عالىمداردىڭ، سونداي-اق قازاقستاندىق جانە شەتەلدىك زيالى قاۋىم وكىلدەرىنىڭ قاتىسۋىمەن ۇيىمداستىرىلعان شارادا تۇركى اكادەمياسىنىڭ «عىلىم» باسپاسىنان جارىق كورگەن اتالمىش ءۇش كىتاپتىڭ ءمان-ماڭىزى جان-جاقتى ءسوز بولدى.
باسقوسۋ سوڭىندا اكادەميا پرەزيدەنتى د. قىدىرالى كورنەكتى ابايتانۋشى مەكەمتاس مىرزاحمەت ۇلىن حالىقارالىق تۇركى اكادەمياسىنىڭ ارنايى مەدالىمەن ماراپاتتادى.
ايتا كەتەيىك، ەرتەڭ تۇركى اكادەمياسى مەن ازەربايجاننىڭ قازاقستانداعى ەلشىلىگىنىڭ ۇيىمداستىرۋىمەن باكۋدە اباي قۇنانبايەۆتىڭ 170 جىلدىعى جانە قازاق حاندىعىنىڭ 550 جىلدىعىنا ارنالعان شارالار وتەدى.
