يراندىق كەمە تەڭىزدە تۇرالاپ قالدى
780 توننا شاماسىندا جۇك ارقالاعان سۋ كولىگىنىڭ العا باسۋىنا تۋلاعان تولقىندار مۇمكىندىك بەرمەسە، كەلىپ توقتاعان جەرىنىڭ تاستى بولۋى كەمەنىڭ استىڭعى بولىگىنىڭ زاقىمدانۋىنا، تەسىلۋىنە اكەلىپ سوقتىرعان.
يراننىڭ «حازار سي شيپپينگ لاين» كومپانياسىنا تيەسىلى «Tiba» كەمەسىن قۇتقارۋ، ونداعى توننالاعان تاۋارلاردىڭ تەڭىز تۇبىندە قالماۋى ءۇشىن العاشىندا كەمە قىزمەتكەرلەرى وزدەرى ارەكەتتەنگەنمەن، سۋ كولىگىن قۇتقارۋدىڭ وڭاي ەمەستىگىنە كوز جەتكىزىپ، قازاقستاندىق «قازاق تەڭىزكولىك فلوت» ۇلتتىق كومپانياسىنان كومەك سۇراۋعا ءماجبۇر بولادى.
قازىرگى تاڭدا جەلتوقسان ايىنىڭ العاشقى كۇندەرىندە باستالعان قۇتقارۋ جۇمىستارىنىڭ ءبىرىنشى كەزەڭى اياقتالىپ، ەكىنشى كەزەڭى باستالعان. ءارقايسىسىندا 8 ەكيپاج مۇشەسى بار ەكى بۋكسير مەن ءبىر بارجا جۇمىلدىرىلعان.
ايتسە دە، قازاقستاندا تەڭىزدەگى وقىس وقيعالاردا، اپاتتى جاعدايلاردا قۇتقارۋ قىزمەتىن ۇيىمداستىرۋ، كەمە مەن كەمە ەكيپاجىنا جاردەمدەسەتىن قىزمەت ويداعىداي دارەجەدە ەمەس ەكەن. سول سەبەپتى ۇلتتىق كومپانيا وكىلدەرى تەڭىزدە كەمەلەردى قۇتقارۋ قىزمەتىن قۇرۋ قاجەت» دەپ سانايدى.
- جۋىردا ازەربايجاندا تەڭىزدەگى كەن ورنىندا اپاتتى جاعداي بولىپ، سۋ قوندىرعىسى ورتەنىپ، سوندا، ءتىپتى، بىرنەشە ادام قايتىس بولدى. سول سەبەپتى، قۇتقارۋ قىزمەتىن قۇرۋدىڭ وتە ماڭىزدى ەكەنىن ايتقىم كەلەدى. ءبىز جاقىندا تەڭىزدەگى مۇناي كەن ورىندارىن يگەرۋگە دايىندالىپ جاتىرمىز، دەمەك، سۋداعى كەمەلەردى قۇتقارۋ قىزمەتىنىڭ قاجەتتىلىگى ارتادى. «قازاق تەڭىز كولىك فلوتى» سول قىزمەتكە بارىنشا جاردەمدەسۋگە، قالىپتاسۋىنا اتسالىسۋعا دايىن. بىزدە قاجەتتى مامان دا، قۇرال- جابدىق تا، كەمەلەر دە دايىن، - دەيدى «قازاق تەڭىز كولىك فلوتى» ۇلتتىق كومپانياسى باس ديرەكتورىنىڭ كەڭەسشىسى ق. ەسەتوۆ.
گۇلايىم شىنتەمىر قىزى
«ەگەمەن قازاقستان»
