تۇمەندە ەڭ سۇلۋ قازاق قىزى تاڭدالدى - فوتو
بيىلعى جىلى سۇلۋلىق بايقاۋى قازاق حاندىعىنىڭ 550 جىلدىعىنا ارنالعان، وعان سەگىز بويجەتكەن قاتىستى. ولاردىڭ اراسىندا قازاقستان ازاماتشاسى - تۇمەن مەملەكەتتىك ۋنيۆەرسيتەتىنىڭ جاڭا تاريح جانە الەمدىك ساياسات فاكۋلتەتىنىڭ ماگيستراتۋرا ستۋدەنتى، الماتىلىق مەرەكە جاقىپبەك بولدى. ول بۇل بايقاۋدا ۆيتسە- ميس اتاندى.
«سۇلۋ قىز» بايقاۋى تۇمەندە 2010 -جىلدان بەرى وتكىزىلىپ جاتىر. شارانىڭ باسىندا ءسوز سويلەگەن قازاقستان رەسپۋبليكاسىنىڭ تۇمەندەگى قۇرمەتتى كونسۋلى سەيىلحان ماقاش 2015 - جىلدىڭ قازاقستان جانە الەمدەگى بارلىق قازاقتار ءۇشىن «نۇرلى جول» مەملەكەتتىك باعدارلاماسىنىڭ باستالۋىنا جول اشقان جانە قازاق حاندىعىنىڭ 550 جىلدىعى اتاپ وتىلگەن جىل رەتىندە ماڭىزىن اتاپ ءوتتى.
بايقاۋدىڭ قاتىسۋشىلارى قازاق حاندىعىنىڭ نەگىزى قالانۋى تاقىرىبىنا كورىنىستەر دايىندادى. بويجەتكەندەر جانىبەك پەن كەرەي حاندار، قاسىم حان مەن تاۋكە حان، ابىلاي حان مەن ەسىم حاندار تۋرالى باياندادى. ولار دايىنداعان تەاترلاندىرىلعان كورىنىستەرگە دوستارى قاتىستى. ەكراندا قازاق حاندىعى تاقىرىبىنداعى سيۋجەتتەر كورسەتىلدى. اتالىمدار اراسىنداعى ۇزىلىستەردە كورەرمەندەردىڭ الدىندا تۇمەندەگى «مەرەي» قازاق ءانسامبلى مەن بي توپتارى ونەر كورسەتتى.
بايقاۋدىڭ باس جۇلدەسى اۆتوموبيل بولدى. سۇلۋ قىز اتاعىنا يە بولعان قىمبات تاكەنوۆا تۇمەن مۇناي- گاز ۋنيۆەرسيتەتىندە ءبىلىم الۋدا.
