قازاقستاندىق ستۋدەنتتەر جاپونيانىڭ ءبىلىم بەرۋ سالاسىمەن تانىستى
قازاقستاننىڭ ءبىلىم دەڭگەيىن تانىتۋعا بىرنەشە جوعارعى وقۋ ورنىنان 10 ستۋدەنت بارعان. ءبىلىمى تەرەڭ، ساناسى وتكىر جاستاردى وزگە ەلدەردەگى قاتارلاستارىمەن تانىستىرۋ باعدارلاماسى Mirai دەپ اتالادى.
بۇل - تۇسىنىستىك، ينتەللەكتۋالدى قارىم- قاتىناس جانە اكادەميالىق الماسۋ دەگەن سوزدەردەن قۇرالعان اببريەۆياتۋرا. جاپون تىلىنەن اۋدارعاندا «بولاشاق» دەگەن تاعى ءبىر ماعىناسى بار. سودان بولار، بۇل جوبا كەلەشەكتە كوش باستاپ، تىزگىن ۇستاي الادى دەگەن ءبىلىمى ۇشقىر، ويى وتكىر جاستاردى عانا جينايدى.
اكاري ۆاتانابە، جاپونيا سىرتقى ىستەر مينيسترلىگىنىڭ وكىلى:
- كەلگەن ستۋدەنتتەر اراسىندا ءبىزدىڭ ەلىمىزگە ەندى عانا قىزىعۋشىلىق بىلدىرگەندەر جانە بۇرىننان جاقسى بىلەتىندەر بار. كەلەشەكتە ولار جاپونيانىڭ مادەنيەتىمەن جاقىن تانىسىپ، ەلدىڭ دامۋىنا ۇلەس قوسادى دەگەن سەنىمدەمىز. ال ءبىزدىڭ ستۋدەنتتەرىمىز، كەرىسىنشە، وزگە مەملەكەتتەرگە بارىپ، ءبىلىم مەن تاجىريبەلەرىن ىسكە اسىرۋى مۇمكىن.
جۇزدەگەن ينتەرناتسيونال توپدىڭ اراسىندا قازاق ەلىن تانىستىراتىن 10 ستۋدەنت بار. سولاردىڭ ءبىرى - اباي جۇمابايەۆ. ول - ماتەماتيكادان كوپتەگەن حالىقارالىق وليمپيادالاردىڭ جەڭىمپازى، قازىر نازاربايەۆ ۋنيۆەرسيتەتىنىڭ ستۋدەنتى. بولاشاق ەكونوميست كونسالتينگ سالاسىندا ەڭبەكتەنىپ، ءتۇرلى كومپانيالار ءۇشىن دامۋ ستراتەگيالارىن جاساۋدى جوسپارلاپ ءجۇر. بۇدان بولەك، ابايدىڭ تاعى ءبىر ەلدەن ەرەك ماقساتى بار.
اباي جۇمابايەۆ، نازاربايەۆ ۋنيۆەرسيتەتىنىڭ Ⅱكۋرس ستۋدەنتى:
- مەنىڭ جاقسى مەكتەپتە ءبىلىم الىپ، ەڭ ۇزدىك ۋنيۆەرسيتەتكە تۇسەتىن مۇمكىندىگىم بولدى. الايدا ول اركىمگە بۇيىرا بەرمەيدى. سوندىقتان مەن ءوزىمنىڭ جەكە قورىمدى قۇرىپ، جاستاردىڭ ساپالى ءبىلىم الۋلارىنا مۇمكىندىك بەرگىم كەلەدى.
Mirai باعدارلاماسى 1 اپتالىق وقۋعا نەگىزدەلگەن. وسى قىسقا ءارى تانىمعا تولى ۋاقىت ىشىندە جاستار جاپوننىڭ تانىمال پروفەسسورلارى مەن وقىتۋشىلارىنان ءدارىس تىڭدايدى. توكيونىڭ ەڭ كورنەكتى جەرلەرىمەن تانىسادى. ال جەرگىلىكتى حالىقتىڭ مادەنيەتى مەن تۇرمىس- سالتىنا قانىق بولۋ ءۇشىن ءتىپتى جاپون وتباسىندا قوناق بولادى.
اقەركە قوجاتاي، نازاربايەۆ ۋنيۆەرسيتەتىنىڭ ستۋدەنتى:
- ءبىز باسقا ەلدەردە وقيتىن ستۋدەنتتەرمەن، وقۋشىلار، مۇعالىمدەرمەن تانىسامىز، ولار ارقىلى مادەنيەتىمەن تانىسامىز. كەيىننەن باسشى بولىپ جاتساق، مەملەكەتتىك قىزمەتتە بولساق، سول ەلدەرمەن جاقسى قارىم- قاتىناس ورناتۋعا ءبىزدىڭ سەپتىگىمىز تيەر دەپ ويلايمىن.
بوتاگوز سماعۇلوۆا، گۋميليەۆ اتىنداعى ەۇۋ ستۋدەنتى:
- جاپون ءتىلىن وقىپ جاتقاندىقتان، بۇل ەلدىڭ مادەنيەتىنە، ەكونوميكاسىنا، ساياساتىنا قىزىعامىن. Mirai باعدارلاماسىنىڭ ۇيىمداستىرۋشىلارىنا العىسىمدى ايتقىم كەلەدى.
تاياۋدا ەلىمىزگە جاساعان ءىسساپارى بارىسىندا جاپونيانىڭ پرەمەر- ءمينيسترى سيندزو ابە قازاق ەلىنىڭ جوعارى بىلىكتى كادرلار دايىنداۋىنا كومەكتەسەتىندىگىن ايتقان ەدى. سول ءسوزى كوپ كۇتتىرمەي، ەكى ەلدىڭ ءبىلىم وردالارى اراسىنداعى ارىپتەستىك ۋاقىت ساناپ كۇشەيىپ كەلە جاتقاندىعانان بايقالادى.
www.24.kz
