ستامبۇل قالاسىندا وتكەن كونكۋرستا «وردا» توبى ەكىنشى ورىندى ەنشىلەدى
ساناۋلى ءسات بۇرىن مارەگە جەتكەن ونەر دوداسىندا قازاقستاننىڭ اتىنان شىققان «وردا» توبى 185 ۇپاي جيناپ، ەكىنشى ورىندى ەنشىلەدى. قازاقستاندىق ونەرسۇيەر قاۋىم بۇل ەرەكشە كونكۋرستى «حابار» ارناسى ارقىلى تاماشالادى.
ءبىرىنشى ورىندى 194 ۇپايمەن قىرعىز ەلىنىڭ ونەرپازى جەەدەش ىدىرىسوۆا جەڭىپ السا، ال ءۇشىنشى ورىندى 175 ۇپايمەن تۇرىك ەلىنىڭ گوركەم دۋرماز ەسىمدى ءانشىسى ولجالادى.
ءتورتىنشى جانە بەسىنشى ورىندا 165 ۇپايدان العان ماكەدونيا (گاگاۋز ۇلتىنىڭ وكىلى) مەن سيريا تۇر.
گراند- فينالدا Turkvizyon ءان بايقاۋىنىڭ تاريحىندا تۇڭعىش رەت بىلتىرعى سايىستىڭ جەڭىمپازى جانار دۇعالوۆا قوناق رەتىندە ءان شىرقادى.
تۇركى تىلدەس مەملەكەتتەردىڭ مادەني- رۋحاني بايلانىسىن نىعايتۋدى كوزدەيتىن بايقاۋعا قازاق ەلى جىل سايىن قاتىسىپ كەلەدى. 2013 - جىلى تۇركيانىڭ ەسكيشەحير شاھارىندا 24 ەلدىڭ قاتىسۋىمەن العاش رەت وتكەن سايىستا قازاقستاندىق «رينگو» توبى 9 - ورىننان كورىنسە، بىلتىر تاتارستان استاناسى قازان قالاسىندا ءانشى جانار دۇعالوۆا «ءىزىن كورەم» ءانىن شىرقاپ، ءدۇبىرلى دودانىڭ باس جۇلدەسىن يەلەندى.
ەلىمىزدە «Turkvizyon-2015» ۇلتتىق كەزەڭىنىڭ فينالدىق تۋرى 6 - قاراشادا استانا قالاسىندا بەيبىتشىلىك جانە كەلىسىم سارايىندا ءوتتى. جەڭىمپاز س م س- داۋىس بەرۋ جولىمەن تىكەلەي ەفيردە انىقتالدى.
ۇلتتىق فينالعا ارداق الەكەشيەۆ، البينا وگانەسيان، ازامات بەكبەرگەنوۆ، «اراي» توبى، AIBOO، باۋىرجان رەتبايەۆ، بەيبىت قوشقاليەۆ، گۇلميرا جۇمابەكوۆا، دياس ابلايەۆ، ەرگەن ايتىمبەتوۆ، قامار سۇلۋ، مارحابا سابيەۆا، رايىم ۋايىس، رۋسلان بەردىماتوۆ، رۇستەم جۇگىنىسوۆ، «سارىن» توبى جانە حانايىم سىندى انشىلەر قاتىستى.
Turkvizyon - «ەۆرو ۆيدەنيە» بايقاۋىنىڭ تۇركى الەمىنە ارنالعان بالاماسى. بايقاۋدىڭ اۋديتورياسى 300 ميلليون ادامنان اسادى.
