مىسىردا «كوشپەندىلەر» كىتابىنىڭ اراب تىلىندەگى اۋدارماسى كوپشىلىككە ۇسىنىلدى
بۇل تۋرالى ق ر س ءى م باسپا ءسوز قىزمەتى حابارلايدى. تاۋەلسىزدىك كۇنىن مەرەكەلەۋ قارساڭىندا 2015-جىلعى 15- جەلتوقساندا كاير قالاسىندا قازاقستان رەسپۋبليكاسىنىڭ مىسىر اراب رەسپۋبليكاسىنداعى ەلشىلىگى مىسىر ۇلتتىق اۋدارما ورتالىعىندا قازاق حاندىعىنىڭ 550 جىلدىعىنا ارنالعان عىلىمي-تاجىريبەلىك كونفەرەنسيا ۇيىمداستىرىپ، «كوشپەندىلەر» كىتابىنىڭ اراب تىلىندەگى اۋدارماسىنىڭ تۇساۋكەسەرىن وتكىزدى.
ءىس-شاراعا سىرتقى ىستەر، حالىقارالىق ىنتىماقتاستىق، مادەنيەت، كونە ەسكەرتكىشتەر جونىندەگى، ۋاقىفتار، تۋريزم مينيسترلىكتەرىنىڭ، اراب مەملەكەتتەرى ليگاسىنىڭ، «ءال-ازھار» يسلام ورتالىعىنىڭ، يۋنەسكو، ءبىلىم، عىلىم جانە مادەنيەت جونىندەگى يسلام ۇيىمىنىڭ (يسەسكو)، ت م د ەلدەرى جانە تۇركيا ەلشىلىكتەرىنىڭ، ءىرى جوعارعى وقۋ ورىندارىنىڭ، قوعامدىق ۇيىمداردىڭ، مار جانە ت. ب. ىسكەرلىك جانە عىلىمي توپتاردىڭ، جەرگىلىكتى جانە ايماقتىق باستى ب ا ق وكىلدەرى، سونداي-اق مىسىر جوعارعى وقۋ ورىندارىندا وقىپ جاتقان قازاقستاندىق ستۋدەنتتەر قاتىستى.
سونىمەن قاتار قۇرمەتتى قوناق ءارى نەگىزگى بايانداماشى رەتىندە قازاقستاننان ق ر عىلىم اكادەمياسىنىڭ كوررەسپوندەنت-مۇشەسى، پروفەسسور بەرەكەت كارىبايەۆ شاقىرىلدى. قازاقستاننىڭ مىسىرداعى ەلشىسى بەرىك ارىن اشىلۋ سالتاناتىندا سويلەگەن سوزىندە قازاق مەملەكەتىنىڭ تاريحي قالىپتاسۋىنىڭ نەگىزگى كەزەڭدەرى مەن ءىلياس ەسەنبەرليننىڭ ادەبي مۇرالارى تۋرالى اڭگىمەلەپ بەردى.
سونىمەن بىرگە، قوناقتار ءبىزدىڭ ەلىمىزدىڭ تاۋەلسىزدىكتەن كەيىنگى جىلدارى قول جەتكىزگەن جەتىستىكتەرى جايىنان ماعلۇماتتار الدى. م ا ر مادەنيەت ءمينيسترى حەلمي ءان-نامنام مەن مىسىر مادەنيەت مينيسترلىگىنىڭ ۇلتتىق اۋدارما ورتالىعىنىڭ ديرەكتورى، پروفەسسور ءانۋار مۋگيس كونفەرەنسيا قاتىسۋشىلارىنا قوشەمەت سوزدەرىن ايتىپ، ەلباسى نۇرسۇلتان نازاربايەۆتىڭ بايسالدى ساياساتى ارقاسىندا كوپۇلتتى جانە كوپ ءدىندى ەلىمىزدە بەيبىتشىلىك پەن كەلىسىمدى ساقتاۋداعى قازاقستاننىڭ جەتىستىكتەرىنە ەرەكشە توقتالدى.
ال «كوشپەندىلەر» تريلوگياسىنىڭ نەگىزگى اۋدارماشىسى، اسۋان ۋنيۆەرسيتەتىنىڭ پروفەسسورى م. رياد قوناقتاردى شىعارمانىڭ سيۋجەتىمەن ءارى ءى. ەسەنبەرلين ومىربايانىمەن تانىستىردى. كونفەرەنسيا بارىسىندا قاتىسۋشىلارعا قازاقستان تۋرالى اراب تىلىندەگى اقپاراتتىق-تانىمدىق ماتەريالدار، قۇرمەتتى قوناقتارعا اراب تىلىنە اۋدارىلعان «كوشپەندىلەر» كىتابىنىڭ 1 تومى سىيعا تارتىلدى.
www.24.kz
