ماسكەۋدە شوقان ءۋاليحانوۆ تۋرالى جاڭا كىتاپ جارىق كوردى

استانا. قازاقپارات - قازاقتىڭ ۇلى عالىمى ءارى زەرتتەۋشىسى تۋرالى جاڭا كىتاپ جارىق كوردى.

ماسكەۋدە «شوقان ءۋاليحانوۆ» كىتابىنىڭ تۇساۋى كەسىلدى. ورىس تىلىندەگى تۋىندى مادەنيەت جانە سپورت مينيسترلىگى مەن رەسەيدەگى قازاقستان ەلشىلىگىنىڭ قولداۋىمەن شىعارىلدى.

كىتاپ قازاقتىڭ ۇلى عالىمىنىڭ 180 جىلدىعى مەن رەسەي گەوگرافيالىق قوعامىنىڭ 170 جىلدىعىنا ورايلاستىرىلىپ شىعارىلعان.

تۋىندىنىڭ اۆتورى جارىلقاپ بەيسەنباي ۇلى 40 جىلعا جۋىق عالىمنىڭ ءومىرى مەن شىعارماشىلىعى تۋرالى زەرتتەگەن، «ىستىقكول ساپارىنىڭ كۇندەلىگى» بويىنشا شوقان ساياحاتتاعان جولدارمەن ءجۇرىپ، شىعىستانۋشى، گەوگراف توقتاعان قالالاردا بولعان.

ءوزىنىڭ زەرتتەۋلەرى بويىنشا بىرنەشە كىتاپ جازدى. بۇل جولعى جاڭا ەڭبەگىن ارحيۆتەن تابىلعان قۇجاتتارمەن تولىقتىردى. وندا بۇرىن-سوڭدى جاريالانباعان ماعلۇماتتار مەن شوقان ءۋاليحانوۆتىڭ ومىرىنە قاتىستى تىڭ جازبالار بار.

جارىلقاپ بەيسەنباي ۇلى، كىتاپ اۆتورى:

- شوقاننىڭ اشىلماعان قىرلارى كوپ. الكەي مارعۇلان ايتقان: «شوقان تۋرالى بىلەتىنىمىزدەن بىلمەيتىنىمىز كوپ»، - دەپ. شوقاننىڭ تالاي ورىس عالىمدارى مەن جازۋشىلارىمەن جازىسقان حاتتارى، ونىڭ تالاي جازعان ەڭبەكتەرىنىڭ كوبى ءالى تابىلعان جوق. ولار بەيمالىم ارحيۆتەردىڭ قويناۋىندا جاتۋى مۇمكىن.

يليا گۋروۆ، رەسەي گەوگرافيالىق قوعامى ديرەكتورىنىڭ ورىنباسارى:

- ازاماتتىق ەرلىك، قىزىقتى وقيعا، اسكەري تاسىلدەر، بارلاۋشىنىڭ ەپتىلىگى -  بارلىعى جاقسى سۋرەتتەلگەن. بۇل كىتاپ وتە قىزىقتى، قازاقستان مەن رەسەي گەوگرافيالىق قوعامىنىڭ ماقساتى مەن مۇددەسى ءۇشىن جول نۇسقاۋشى دەسەك تە بولادى. ەكى ەلدىڭ ىنتىماقتاستىعى مەن بايلانىسى دا وسى تۋىندىدان تابىلادى.

www.24.kz