قاراعاندىدا عالىم جارىلعاپوۆتى ەسكە الۋعا ارنالعان تۋرنيرگە قىتاي بوكسشىلارى دا قاتىسىپ جاتىر
جارىس قورىتىندىسى بويىنشا ۇلتتىق قۇراما ساپىنا ەنەتىن ۇزدىك بوكسشىلار ىرىكتەلەتىن بولادى.
21- جەلتوقسانعا دەيىن جالعاساتىن سايىس سەرىك ساپيەۆ اتىنداعى بوكستى دامىتۋ ورتالىعىندا وتۋدە. كەشە وتكەن جارىستىڭ اشىلۋ سالتاناتىنا 2004-جىلعى افينا وليمپياداسىنىڭ چەمپيونى، ۆەل باركەر كۋبوگىنىڭ يەگەرى باقتيار ارتايەۆ، 2012-جىلعى لوندون وليمپياداسىنىڭ چەمپيونى، ۆەل باركەر كۋبوگىنىڭ يەگەرى سەرىك ساپيەۆ، باسكەتبولدان ك س ر و قۇراماسىندا ويناپ، 1988-جىلعى سەۋل وليمپياداسىنىڭ چەمپيونى اتانعان ۆالەري تيحونەنكو، 2000-جىلعى سيدنەي وليمپياداسىنىڭ چەمپيونى ەرماحان يبرايموۆ جانە 2008-جىلعى بەيجىڭ وليمپياداسىنىڭ چەمپيونى باقىت سارسەكبايەۆ قاتىستى.
جارىسقا قازاقستاننان بولەك، رەسەي، قىتاي، موڭعوليا، وزبەكستان، قىرعىزستان جانە تاجىكستان ەلىنەن كەلگەن بوكسشىلار دا قاتىسۋدا. شارشى الاڭداعى كۇرزى جۇدىرىقتى جىگىتتەردىڭ باسەكەسىنە ەلىمىزدىڭ اتىنان 90 عا جۋىق بىلعارى قولعاپ شەبەرى قاتىسۋدا. ولاردىڭ قاتارىندا تانىمال قازاقستاندىق بوكسشىلار ادىلبەك نيازىمبەتوۆ، قايرات ەراليەۆ، ولجاس ساتتىبايەۆ، ءىلياس سۇلەيمەنوۆ پەن سامات باشەنوۆ تە بار.
جارىسقا قاتىسۋشىلاردىڭ كوپ بولىگىن جاس بۋىن بوكسشىلار قۇرايدى. ولارعا وسى جارىس ارقىلى كوزگە تۇسۋىنە جول اشىلماق. جالپى عالىم جارىلعاپوۆ اتىنداعى تۋرنير 1986-جىلدان بەرى ۇيىمداستىرىلىپ كەلەدى.
عالىم جارىلعاپوۆتى ەسكە الۋعا ارنالعان بوكس دوداسى - تالاي بوكسشىلاردىڭ ۇلكەن سپورتقا قادام جاساۋىنا سەپتىگىن تيگىزگەن ەلىمىزدەگى ەڭ ءىرى جارىستاردىڭ ءبىرى. تاريحى تەرەڭدە جاتقان بۇل بوكس باسەكەسىنەن وليمپيادا چەمپيوندارى مەن تالاي الەم چەمپيوندارى تۇلەپ شىققان. اتاپ ايتار بولساق، بۇگىندە كاسىپقوي بوكستا ەلىمىزدىڭ ابىرويىن اسقاقتاتىپ جۇرگەن گەننادي گولوۆكين بۇل تۋرنيردە بەس رەت توپ جارعان. اتلانتا وليمپياداسىنىڭ چەمپيونى ۆاسيلي جيروۆ پەن سيدنەي وليمپياداسىنىڭ جەڭىمپازى ەرماحان يبرايموۆ تا عالىم جارىلعاپوۆ تۋرنيرىنىڭ بەس دۇركىن چەمپيوندارى اتانعان. 2000-جىلى سيدنەي وليمپياداسىنىڭ شىڭىن باعىندىرعان مارقۇم بەكزات ساتتارحانوۆ تا بۇل تۋرنيردە ءۇش رەت جەڭىمپاز تۇعىرىنان كورىنگەن. ودان وزگە، لوندون وليمپياداسىنىڭ جەڭىمپازى، قازىرگى تاڭدا «Astana Arlans» كومانداسىنىڭ ديرەكتورى سەرىك ساپيەۆ تە بۇل تۋرنيردى ءۇش رەت جەڭگەن بوكسشىلار قاتارىنان. ال «عالىم جارىلعاپوۆ تۋرنيرىندە ەڭ كوپ توپ جارعان بوكسشى كىم؟» دەگەنگە كەلسەك، سارىارقا توسىندە تۋىپ-وسكەن اركادي توپايەۆتىڭ ەسىمىن ەرەكشە ماقتانىشپەن ايتا الامىز. 1994-جىلى الەم كۋبوگىنىڭ جەڭىمپازى اتانعان بىلعارى قولعاپ شەبەرى بۇل تۋرنيردى جەتى رەت ۇتقان جالعىز بوكسشى.
قاراعاندىداعى دودادا ۇلتتىق قۇراماعا ۇمىتكەر بوكسشىلار ىرىكتەلەدى. باس جاتتىقتىرۋشى مىرزاعالي ايتجانوۆ قازاقستاندىق بىلعارى قولعاپ شەبەرلەرىنىڭ بابىن بايقاپ كورەتىن بولادى. اسىرەسە 2016-جىلعى وليمپياداعا جولداما الماعان سالماقتارعا بوكسشىلار قاجەت ەكەنى راس. سوندىقتان ەلىمىزدەگى وبلىستار بيىلعى دوداعا كىل مىقتىلارىن قوسىپ وتىر. سونداي-اق وبلىس اتىنان قاتىسۋشىلار سانىنا دا شەك قويعان جوق. ەڭ كوپ بوكسشىلار (18 بوكسشى) قاراعاندى وبلىسىنان قاتىسىپ وتىر. استانا قالاسىنىڭ كومانداسى جارىسقا 13 بوكسشىمەن بارعان.
ايتا كەتەيىك، قازىرگى تاڭدا بوكستان ريو وليمپياداسىنا قازاقستان قۇراماسىنىڭ قورجىنىندا 4 جولداما بار. ونى ءبىرجان جاقىپوۆ (49 كەلى)، بەرىك ءابدىراحمانوۆ (60 كەلى)، دانيار ەلەۋسىنوۆ (69 كەلى) پەن ۆاسيلي ليەۆيت (91 كەلى) جەڭىپ العان بولاتىن. كوكتەمدە اسپان استى ەلىندە وليمپيادانىڭ كەزەكتى جولدامالارى ساراپقا سالىناتىن بولادى.
massaget.kz
