الماتىدا ترياتلوننان اشىق بىرىنشىلىك وتكىزىلەدى
وعان قاتىسۋشىلار 500 مەترلىك قاشىقتىققا سۋدا جۇزەدى، 20 شاقىرىمعا ۆەلوسيپەدپەن جارىسادى جانە 5 شاقىرىمعا جۇگىرىپ جارىسادى.
وسىمەن ءۇشىنشى رەت ۇيىمداستىرىلىپ وتىرعان چەمپيونات بۇل جولى جابىق زالدا وتەدى. جارىستىڭ بارلىق ءۇش كەزەڭى ءۇزىلىسسىز، بىرىنەن-سوڭ ءبىرى وتكىزىلەتىن بولادى. وعان بارلىعى 50 ادام قاتىسادى دەپ كۇتىلۋدە. بيىلعى بىرىشىلىككە قىرعىزستاندىق سپورتشىلار قاتىسۋعا نيەت ءبىلدىرىپ وتىر.
«ترياتلون قازاقستاندا بارعان سايىن تانىمال بولا تۇسۋدە. بۇل وتە ءتوزىمدى ادامدارعا ارنالعان سپورت ءتۇرى. ترياتلوندا سەنىڭ ۆەلوسيپەدشى، جەلاياق نەمەسە جۇزگىش ەكەنىڭ ماڭىزدى ەمەس. بۇل جەردە سەن ترياتلەتسىڭ. ياعني، جەڭىسكە جەتۋىڭ ءۇشىن ۇشەۋىندە بىردەي ۇزدىك بولۋىڭ كەرەك»، - دەدى «World Class Almaty» فيتنەس-كلۋبىنىڭ ديرەكتورى سالتانات قازىبايەۆا.
جارىسقا قاتىسۋشىلار ءۇش توپقا ءبولىنىپ جارىسادى. ولار 18-30, 31-40 جانە 41-50 جاس ساناتتارى بويىنشا باق سىناسادى. جەڭىمپازدار ەرلەر مەن ايەلدەر اراسىندا جاس ەرەكشەلىكتەرىنە بايلانىستى جىكتەلگەن توپتار بويىنشا ابسوليۋتتى بىرىنشىلىكتە انىقتالادى.
جارىس 20- جەلتوقسان كۇنى تاڭعى ساعات 09:00 دە «World Class Almaty» فيتنەس-كلۋبىندا باستالادى.
بىرىنشىلىكتى ۇيىمداستىرۋشى ۇيىمدار - «World Class Almaty» فيتنەس-كلۋبى مەن الماتى مارافونى.
اۆتور: جاپپاربەرگەن ايبوتا
