دجون كەرري ا ق ش قازاقستاننىڭ تاۋەلسىزدىگىن مويىنداعان ءبىرىنشى مەملەكەت ەكەنىن ايتتى
«ا ق ش- تىڭ حالقى جانە پرەزيدەنتى باراك وبامانىڭ اتىنان مەن قازاقستان حالقىن 16 -جەلتوقساندا تويلاناتىن تاۋەلسىزدىگىنىڭ 24 جىلدىعىمەن قۇتتىقتايمىن»، - دەلىنگەن مەملەكەتتىك حاتشىنىڭ مالىمدەمەسىندە.
دجون كەرري «ا ق ش 1991 -جىلى قازاقستاننىڭ تاۋەلسىزدىگىن مويىنداعان ءبىرىنشى مەملەكەت، سول كۇننەن بەرى دوستىعىمىز ودان ءارى نىعايىپ كەلەدى . شيرەك عاسىرعا جۋىق ۋاقىت كەزەڭىندە ءبىز قاۋىپسىز، تاۋەلسىز جانە وركەندەگەن قازاقستانعا سەرىكتەس بولىپ كەلەمىز» - دەپ مالىمدەدى مەملەكەتتىك حاتشى.
«بيىل استاناعا ساپارمەن بارىپ، قازاقستاندىقتاردىڭ رۋحىن جانە سەرپىندى مادەنيەتىن كورۋ مەن ءۇشىن ۇلكەن قۇرمەت بولدى. پرەزيدەنت نازاربايەۆپەن جانە پرەمەر-مينيستر ماسىموۆپەن كەزدەسۋ جانە سىرتقى ىستەر ءمينيسترى ىدىرىسوۆپەن ا ق ش- قازاقستان ستراتەگيالىق سەرىكتەستىگى تۋرالى ديالوگتى بىرلەسىپ باسقارۋ قۇرمەتىنە يە بولدىم. تالقىلاۋلار بارىسىندا مەن قازاقستاننىڭ باسشىلارىنا جاھاندىق ماسەلەلەردى شەشۋدەگى، ونىڭ ىشىندە ەكسترەميزمگە قارسى كۇرەس جانە يادرولىق قارۋدى تاراتپاۋداعى، مەملەكەتىڭىزدىڭ ماڭىزدى ءرولى ءۇشىن العىسىمدى ءبىلدىردىم»، - دەدى دجون كەرري.
ول سونداي-اق ا ق ش ۇكىمەتى قازاقستاننىڭ دەلەگاتسياسىن 2016 -جىلدىڭ باسىندا ۆاشينگتوندا ستراتەگيالىق سەرىكتەستىك تۋرالى ديالوگتىڭ كەلەسى كەزەڭىن وتكىزۋگە جانە ينستيتۋتسيونالدىق رەفورمالاردى جۇزەگە اسىرۋ جولىنداعى 100 ناقتى قادام باعدارلاماسىن ىسكە قوسۋعا قولداۋ كورسەتۋدى تالقىلاۋ ءۇشىن كەزدەسۋگە ۇمىتتەنەتىنىن اتاپ كورسەتتى.
«تاۋەلسىزدىك كۇنى قارساڭىندا مەن بارشا قازاقستان حالقىنا بەيبىتشىلىك جانە امانشىلىق تىلەيمىن. تاۋەلسىزدىك كۇنى قۇتتى بولسىن!»، - دەگەن تىلەگىن ءبىلدىردى ا ق ش مەملەكەتتىك حاتشىسى.
